نيجي بقا للقبول الغير مشروط
انا اموت واعرف مين العبقري اللي اخترع التعبير ده؟
حضرتك انا معرفش حد قابل نفسه هو شخصيا قبول غير مشروط..
الاستاذ اللي ورا.. حضرتك عاجبك كل حاجه في نفسك وقابلها زي ما هي؟
حضرتك ده عرض مرضي والنعمه..
اللي ناس كتير فهماه حول التعبير ده مش صح ومش حقيقي.
القبول الغير مشروط بيبقى للشخص ككل..
مش لتفاصيله..
لا يمكن في حياتك هتقابل حد تعجب بكل حاجه فيه..
ولا يمكن تكون معجب بكل حاجه في نفسك مالم تكن من أصحاب اضطراب الشخصية النرجسية.. اللهم احفظنا واحفظكم من أشكالهم الغبرة.
القبول غير الشروط اللي ممكن يتقدملك من حد قريب منك بيبقى ليك ولوجودك في حياته..
لكن ده لا يعني اطلاقا انه مش هيعترض على صفات فيك أو حاجات انت بتعملها او قرارات بتاخدها..
والتعسف في الموضوع ده زاد اوي الحقيقة..
لو لقيت نفسك محدش بيعلق على اي حاجه تخصك.. تأكد انك ملكش حد قريب ولا حد مهتم..
لما بنهتم بنحاول نشارك.. بنحاول نلحق بعض من اللي شايفينه خطر او غلط.. حتى لو اللي احنا مهتمين بيه ده ماشي بدماغه.. برضه هنتكلم..
لو محدش حواليك بيتكلم يبقى محدش مهتم.. او فقدوا فيك الأمل..
نقول تاني.. رفض حد قريب منك اتصرف او طبع فيك.. ليس رفضا ليك انت في المجمل..
هو اه مش شرط اعتراضه ده يكون صح.. بس احنا لو متكلمناش واتناقشنا واعترضنا واتخانقنا واتراضينا.. نبقى موجودين جنب بعض ليه اصلا؟؟
محدش بيشوف الصورة كاملة لوحده.. لما حد يحاول يوضح لك الصورة اسمعه.. هو مش رافضك.. ومش بيقلل منك.. هو بيحاول يوريك جوانب تانيه..
وللإنصاف.. الكلام ده لا يشمل الناس الحشرية اللي فاكرة نفسها ام العريف وهما بقا اللي هيقولولك كل حاجه صح.. دول اديهم بالشبشب عادي ميهمكش..
دول بيكلموك علشان نرجسيتهم هما مش علشان مصلحتك انت..
تعرف الفرق ازاي؟
راقب نمط تصرفات اللي حواليك مع بعض.. مش معاك انت بس.. هل هما مهتمين؟ ولا هما بيتدخلوا والسلام؟ هل هما بيعملوا كده مع الناس القريبة؟ ولا رافعين عصاية ابو العريف على كل الناس؟ هل هما بيقبلوا الكلام من حد مهتم؟ ولا هما اللي من حقهم يدوا نصايح وخلاص؟ وهكذا.....
نقول تاني.. مش كل حد جي يرفض حاجه فيك يبقى رافضك..
ومفيش حد مهما كان قريب ومهما كان بيحبك هيوافق على كل حاجه فيك..
المهم اننا نبقى مرتاحين وسط دواير قريبة.. خلافاتنا جواها مش جوهرية.