هل فيه ناس حساسه اكتر من غيرها؟
الحقيقة اننا بنستخدم تعبير حساس ده في وصف الناس اللي حدة مشاعرها عاليه شويتين
وبالتالي المواقف اللي بتعدي عند اغلب الناس عادي.. مش بتعدي عندهم عادي خالص..
وبتسببلهم مشاعر سلبية حادة.. بتأثر على يومهم ويمكن ايام كمان قدام..
طيب ليه ديه مشكله؟
ببساطه مفيش حد فينا بيعدي عليه اسبوع مثلا.. من غير موقف واحد على الاقل يدايقه..
فتخيل كده لو قدرتك على إدارة مشاعرك السلبية محدود..
بمعنى انك بدل ما تعدي العكننه بتاعة الموقف في ساعه ولا اتنين.. لا بتاخد كذا يوم..
حط بقا موقفين في الأسبوع.. لحد بيقعد كام يوم على ما يروق من موقف سئ..
يبقى الشخص الغير قادر على إدارة مشاعره..
اللي بيوصف خطأً بأنه حساس.. اسبوعه كله انضرب..
والاسبوع بيجر شهر.. والشهر يجر سنه.. والسنه تجر سنين..
والأفكار تجيب بعض
انا اللي حساس زيادة.. لا الناس هي اللي مش بتحس اصلا..
فبدل ما يعرف يركز على تحسين قدرته على إدارة مشاعره.. بيكتئب زيادة لان المشكله بقت في الناس.. هما اللي مش بيحسوا.. وانا مفيش في أيدي حاجه علشان اخليهم يحسوا...
ويدخل في حالة من اليأس كده..
الحقيقه للأسف الشديد مفيش حد بيدور علي علاج من الاول..
مفيش حد بيطلب مساعدة علشان هو شخص حساس باللغة الدارجة...
هو بييجي بعد ما يكتئب وييأس..
والدوامة بتبقى كبرت..
وسرقت سنين من عمره..
وكومت أخطاء تفكير كتير فوق بعض..
وبقا التعامل معاها أصعب شوية..
والوقت اللازم لعلاجها اكتر شوية..
البوست الطويل ده كله علشان اقولك.. لو انت شايف ان مشاعرك السلبية معكننه عليك طول الوقت.. او انت عموما مش بتعرف تخرج من العكننه ولا الزعل ولا الزهق ولا الغضب او أياً كان بسرعة معقوله..
متستناش حياتك تقف.. اطلب المساعدة دلوقتي.. هتوفر عليك كتير في حياتك اللي جايه..
طبعا ده انت او انتي.. الكلام هنا بصيغة المذكر علشان هما قالولنا كده في اللغة العربية بس..
ومقدرش انكر ان دي مشكله اكثر شيوعاً في الستات عن الرجالة..
ولو انها اسوء وأكثر حدة في الرجالة..