اوقات الناس بتتخطف وتتوه في منافسة مش مفهومه اصلا.. وممكن تكون مش موجودة غير في دماغهم هما بس..
وممكن تخرب حاجات كتير اوي في حياتهم..
سيبك من مين يطلع الأول
ومين ياخد الترقية
لا فيه منافسات اكثر غرابة من كده بكتير..
بتحب مين اكتر.. ماما ولا بابا؟؟
بتحب مين اكتر.. تيته مامة ماما ولا مامة بابا؟؟
افتكر ده بيبقى بداية المنافسات اللي ممكن الناس تتسحل وراها وهي مش المفروض تكون موجودة اصلا..
ايه وجه التنافس بين ماما وبابا اصلا علشان حد فيهم يبقى اكتر او اقل؟
ليه اضطر حد انه يختار اكتر وأقل في حاجه احنا محتاجين انها تبقى اكتر واكتر..
الستات بتاعة بتحب امك اكتر ولا بتحبني!!
ايه وجه المنافسة اصلا؟
دول دورين مختلفين في حياة شخص..
خانتين مختلفتين اصلا..
وبرضه ياريت لو كانت اكتر واكتر.. مش اكتر وأقل..
عايز بتبقى كذا.. ولا كذا...
ما يمكن عايز اعمل الاتنين؟!
ساعات مش بيبقى في بينهم تضارب اصلا..
بس احنا او ناس حوالينا بنخلق تضارب ومنافسة بين حاجات وأشخاص.. لمجرد ان دي فكرة في دماغنا احنا او ناس معينه حوالينا..
فلان بيعمل كذا علشان يسبقني.. علشان ياخد مكاني..
وممكن فلان ده لا يكون شايفك ولا شايف مكانك ده ولا انت فارق معاه اصلا..
المشكله انك ممكن تتسحل ورا منافسة.. وانت مش واخد بالك..
لو حد لفت نظرك.. او لو انت خدت بالك..
أقف لحظة مع نفسك الأول واسأل...
هو ده فعلا وضع منافسة؟؟
فيه مسابقه اصلا؟؟
فيه مقارنة اساسا؟؟
ولا انا بجري وخلاص؟؟
ده قبل طبعا ما تعيد تقييم قيمة اللي بتتنافس علشانه..
وخلي بالك انه من حقك في اي وقت.. توقف منافسة او مقارنه اكتشفت انها وهم.. سراب.. او حاجه ملهاش لازمه.. او حاجه معكننه عليك حياتك وخلاص