Life knows where to hit you..
ديه حقيقه
الحياة بتبقى عارفه فين يوجعك..
والمنطق والمعطيات المحيطة بتثبت انه محدش بياخد كل حاجه..
واصلا الحياة لما بتاخد منك حاجات صغيرة انت مش بتاخد بالك..
فدايما هتاخد منك حاجه كبيرة..
قدرتك على تجاوز الصعاب في الحياة بتعتمد إلى حد كبير على التأقلم والتجاوز بعد ما تضربك ضربة كبيرة..
وازاي تعمل ده ناس كتير اوي بتتكلم فيه..
انا بس عايزه افكركم انه واحدة من المشاكل اللي بتحصل بعد الخساير الكبيرة.. انك ممكن تبطل تآمن بأحلام جاية.. طالما راح منك احلام كبيرة.. ايا كانت الأسباب.. بتخاف تآمن..
علشان بتبقى عارف انك كل ما تآمن اوي بحلم وميتحققش.. بتتوجع اوي.. زي اللي بيقع من سابع سما.. لسابع أرض.
فبتخاف تطير..
و بيبقى آخرك تحلم من ع الوش كده..
لا بتمسك اوي.. ولا بتعرف تسيب..
وتحاول تعيش كده في النص..
حتى لو مفيش حاجه هتسعدك اوي.. على الاقل مفيش حاجه هتدبحك..
اللي هو بتلم السكاكين.. حتى لو مش هتلاقي سكينة تقطع اللي محتاج تأكله..
المهم مفيش حاجه تدبحك..
ومش بتاخد بالك وانت بتعمل انك بتخسر جزء كبير من حماسك للحياة اللي بيديها طعم..
وتبقى ماسخه وملهاش طعم..
التوازن بين اللي تقدر تحققه واللي الحياة كده كده بتاخده منك مش سهل.. بس يستاهل التعب علشان متبقاش عايش من غير روح..