علم النفس و علوم التربية هتقولك ان القبول شئ مهم.. و احتياج اساسي لكل الناس على اختلاف اعمارهم.. و اهم كمان للأطفال..
حالات كتير اوي منهم انا و انت والأغلبية العظمى من الناس في هذا المجتمع الكئيب اللي واحده من عيوبه القاتله ان ناسه مش قادره تقبل بعض على اختلافها.. بييجي من عدم القبول..
الناس اللي بتحس بالفرق فعلا (و انا منهم) اللي جربوا يعيشوا من غيره و بعدين دوروا عليه و لقوه..
اتعلموا يقبلوا نفسهم و يقبلوا الناس على اختلافهم.. و قدروا يحوطوا نفسهم و لو بدايرة أمان صغيرة من ناس قبلاهم..
مهما الكتب قالتلك ان القبول شئ مهم.. الا انك قليل اوي ما هتلاقيه في الدنيا..
بس اللي اتعلمته انك لما بتتعلم تقبل الاختلافات اوي.. بيبقى اسهل عليك تبقى اوضح مع نفسك و اقرب لنفسك الحقيقية.. فالناس بيبقى اسهل عليها تقراك.. و بالتالي بتشد ناس فيهم شبه كبير منك.. و كل حاجه بتبقى احسن مع الوقت..
طول ما انت حابس نفسك في قالب مثالي مش شبهك اوي.. هتفضل وسط ناس مش شبهك اوي.. و هيفضل القبول شئ صعب تلاقيه..
لو نجحت.. هتلاقي نفسك قادر تقول اكبر عيوبك و غلطاتك القاتله اللي عملتها في حياتك لعدد اكبر من الناس.. و الناس دي بتوع دايرة الأمان.. بيبقوا كنزك الحقيقي.. حافظ عليه.. اوي
لكل اللي عارفين عني اكبر عيوبي و مصايبي و قابليني بيهم.. شكرا.. انتوا كنز.. و انا مقدره وجودكم جدا.. و سامحوني لو في يوم قصرت في حق حد فيكم.. اكيد بيبقى التقصير مش مقصود..
#شكرا