عزيزي/عزيزتي.. االي شايفين انهم بيدمروا في علاقاتهم بالناس و بيفتكروا فيهم حاجات كويسه كتير مش فيهم.. اللي بيتعشموا بزيادة.. اللي بتخلص حكايتهم دايما بجمل زي: مكنتش اتصور انه/انها كده.
مكنتش اتخيل انه يطلع منه /منها كل ده.. مش ممكن هو / هي يعمل كده.. و غيره و غيره..
دور في الناس اللي حواليك ع الضمير.. مش معاك بس.. بص على علاقاتهم بكل اللي حواليهم.. الضمير صوته عالي و مش بيتلون.. و لو ركزت هتعرف تشوفه.
الضمير غير التدين.. هتلاقيه هو هو بنفس شكله على اختلاف الاديان او حتى انعدامها..
له لغة وسمات واحدة على اختلاف الثقافات و الاعراف و التقاليد..
له صبغة على كل تعاملات الانسان مع الوزير او مع الغفير.. و بيبقى واضح مع الغفير كمان اكتر.. بمعنى انك هتعرف تشوفه في تعاملات الناس مع اللي اضعف منهم بصورة واضحه جدا.
وغالبا مش بيرقص.. حتى لو جاله موقف ولا اتنين ولا كام يوم تاه فيهم.. صوته العالي بيغلب..
متحكمش على حد من تصرفاته معاك لوحدها.. بص ع الباقي.. محدش بيمثل في كل علاقاته.. محدش بيعرف يرسم الضمير طول الوقت..