02-28-21, 11:49 AM
|
#1593 |
| | 
طالبك لا تطفي انوار المدينه
نورك اللي اقبل الليلة هداني
يا هلا بك يا سنا عمري وسنينه
مرحبا باللي تضوي لي زماني
كلما بي لك ولا تستاذنينه
الا شوفي لي دام الله عطاني
صرت اشوفك بس وما للغير بينه
كن جمالك خالقه ربي عشاني
المها ما توصف اللي ترمشينه
بان لي لحظة ومن موتي حياني
زانت رموشه ورسمة حاجبينه
دانة في قلبها فص كهرماني
والحرير البندقي ساكب بزينه
والشفايف جمرها احمر كواني
يا نعومة قطن تبرز غمزتينه
لا بسمت والخال بالدهشة رماني
الخشم منحوت نحتًا من جبينه
والجسم ممشوق من وقفه سباني
الخصر فيها يناقض تربتينه
والردف لا مال قلت الله بلاني
ينبض الخافق وصوته تسمعينه
والحكي غار وقصد لك واحتكاني
واسمع حروفك شعر ما توزنينه
ينوزن في الحال وبعذبه رواني
حتى عطرك انتي اللي تعطرينه
لانك أنقى زعفران أصفهاني
والذهب ما تلبسينه يا ثمينه
يلبسك ويقول في نحرك بهاني
والليونة الين من الزبد لينه
من عجبها صارت السبعة ثماني
في الوصف ما تشتهينه تملكينه
غانية بالمختصر احلى الغواني
وين شوفي قلت لك لا تاخذينه
انسحر بالزين وأعلن لك جناني
مرت الأيام وانت تسحرينه
واحتوى حبك فوادي واحتواني
لين شفتك تغدرين وتحضنينه
ضاقت الدنيا علي والموت جاني
حاول الخافق يكذب مقلتينه
واغربت شسمك وصار النور داني
يوم بدلتي حناني بحنينه
صارت الدنيا ظلام فيوم فاني
والشعور اللي عجزتي تكرمينه
مات في لحظة وقبره في كياني
مقبرة صدري مشاعرها دفينه
لا حزن فيها ولا حتى اماني
ما ابي منك عذر اتفبركينه
مستحيل اقبل يكون القلب ثاني
احذري غدر الهوى لا تآمنينه
واعرفي انك كما دنتي تداني
كنت أحسبك في المحبه لي أمينه
ما هقيت انك تخوني في ثواني
ما هقيت انك خفوقي تخدعينه
تتركينه بالهوى حاير يعاني
كيف صرتي شوك وإنتي الياسمينة
كيف صرتي لي الم وانتي اماني
كنت أحسبك بالعقل وحده رزينه
ما هقيتك طايشه بكل المعاني
لا تجيني من بعد ما تفقدينه
لا تقولي طيش في لحظة عماني
لين صرتي فل هوى تتنفسينه
وصارت حروفه على سمعك أغاني
لين صرتي كل لحظة تحترينه
والتسائل في فؤادك وش دهاني؟
لا تجيني من بعد ما تخسرينه
يوم بديتي حنينه عن حناني
اظلمت دنياي وقلت النور وينه
وانتشلت القلب من وسط المحاني
وارتحلت وشلت قلبي في السفينة
والمشاعر هالكه وسط المواني |
|
|
|