اوقات بيحصل موقف ما.. يمكن يكون عادي.. او مش عادي..
بس يحصل بسببه سلسلة من الانفجارات كده في دماغك..
وكأن كل الغلطات والقرارات السيئة اللي عملتها في حياتك قررت فجآه تطاردك..
قررت فجأه تخرج من الحفر اللي مدفونه فيها جوه دماغك وتهاجمك..
وتعاملك كما لو كنت انت خدت القرارات دي وانت عارف انها غلط..
تعاملك زي ما تكون بتحاسبك من اول وجديد..
الدايره دي كئيبة جدا.. ومؤذية جدا..
وبتهاجمك اوقات حتى لو انت بعيد دلوقتي سنين كتير عن الخطوات دي..
حتى لو انت كنت في السنين اللي فاتت عملت حاجات كتير كويسه تحاول تلم بيها اضرار القرارات دي.. او تعوض الخساير اللي حصلت بسببها..
وتفكرك انك برضه مفيش فايده فيك انت لسه بتعمل غلطات كبيره..
ويمكن حتى بتكرر حاجات في غلطات قديمه..
وبترجع تاني تجرب طرق رجعت منها قبل كده خسران وموجوع..
كل ده بيحصل جوه دماغك في ثواني.. وبيحصل غصب عنك
و بيستمر بعدها..
يستمر بقا ساعات ولا يستمر ايام ولا حتى شهور..
ديه بقا في ايدك..
في ايدك تقول لنفسك انك انسان عادي وبتغلط..
غلطات كبيره بقا ولا صغيره... كده كده بتغلط..
وهتفضل تغلط..
في ايدك تفكر نفسك ان الغلطات اللي عملتها من سنين.. كانت مبنيه على المعطيات اللي عندك من سنين..
وان كونك مش ممكن تغلطها دلوقتي.. فده معناه انك اتحسنت.. فهمت.. نضجت.. وديه حاجه تحسب ليك.. مش عليك..
وان مفيش حاجه في الحياه تخليك تلغي غلطات الماضي.. ولا حتى غلطات النهارده ولا حتى غلطات بكره..
بس تقدر تعمل احسن ما عندك.. علشان الغلطات دي ميبقاش تمنها اكتر من اللي انت تقدر تدفعه.
اه في حاجات في حياتنا غلط.. واه في حاجات بنفضل نحاسب عليها طول عمرنا..
بس افتكر انه يحسبلك انك قادر تحاسب عليها..