البنات في البلد دى ليها حق انها تخاف من كل حاجة.. من اول المشي في الشارع لغاية المشي في الحب.. ومن اختيارها للبسها لغاية اختياراتها السياسية.. ومن فتح رسايل ال other لغاية فتح بيت جديد.. منهم اللى بتتسق مع شراسة الواقع دة وساعتها بنكرهها عشان قوتها، ومنهم اللى بتمشي جنب حيط انوثتها وساعتها بنستغلها عشان ضعفها، ومنهم اللي بتحاول تحافظ على اﻻتنين.، ودى بتبقى في حرب حقيقية، طاحنة ومنهكة ومستمرة، بتفضل تعافر فيها لغاية ما تنسى هي بتحارب مين، وبتحارب ليه، كل اللي بتفتكره، ساعة ما أي حد يطبطب عليها، إن جواها وجع كتير، كإنه زلط صغير متنتور في كل جسمها، المفروض تمشي بيه، وتشتغل، وتحب، وتآمن، وتنبسط. وساعتها بتحس نفس إحساس الشارع اللي بيشوف نفسه بعد حرب عنيفة، أو ثورة عشان دي اللي شفناها فعﻻ، وهو بيقول، أنا أكيد ما كنتش كدة
لو قابلت واحدة من دول، اوعى تسيبها، وفي نفس الوقت اوعى تزهق من محاولة تطمينها،
اوعى تكون مصدر ضغط اضافى عليها، وفي نفس الوقت اوعى تنسى تكون حضن تستريح فيه من الحرب دي ولو لدقايق
اوعى تكدب عليها، وفي نفس الوقت اوعى تكون صادق بنفس درجة صدق الواقع ووقاحته
واذا كان دة حيخلى العﻻقات معقدة، فﻻزم احنا اللى نشيل، ﻻننا احنا المسؤولين، احنا الوﻻد، او احنا العالم