يا عقاب مـدري مـدح والبستـك اوشـاح
والا الـرمــوز يْحـلـهـا مــــن طـرقـهــا
يـــا سـيّــد الـزرقــا تـعـلّـي ومــــرواح
لــن سقتـهـا مــع قـبـة الـكـون سـقـهـا
تـكّــي بـصــدرك للـذعـاذيـع وارتــــاح
وافـلــج مـحـاديـب السـحـايـب وفـقـهـا
خـلّ السـواري عـنـك وانــزاح وانــزاح
واعــلا مراقـيـبٍ عـلـى الـجـدي وقـهــا
مثلـك لـيـا سـتّـل جنـاحـه مــع الـضـاح
وارخــى سـمـار الـريـش فــي معتلقـهـا
استسلـمـت كــل الـجـوارح لـمـن شــاح
عـنـهـا وجـــدّد مـــن عـلّــوه رهـقـهــا
سـيـفٍ لـيـا جــرّد عـلـى الصـيـد ذبّــاح
ومــوسٍ لـيـا نــاش الضـوافـي حلقـهـا
اهـــواي نـجــم وكفـخـتـك بــــارقٍ لاح
وتكبـيـرة المـيـت عـلـى الـلــي لحـقـهـا
ومــا بـيـن مخـلابـك وفــلاج الاصـبـاح
بـيـض الثـنـادي قـبـل يـرهــج علـقـهـا
زوعتـك سـيـل وطعنـتـك عَيْـلـم ارمــاح
مــن مخـلـبٍ والـيـا صفـقـهـا صفـقـهـا
لا ملـت شـلـت ولا تواسـيـت وان طــاح
ضـلّــك عـلــى كـبــد الـطـريـده فلـقـهـا
والا لـيـا نـشـت الخريـشـه مــن الــراح
مــا كــن ربـــك بـعــد تـدمــي خلـقـهـا
واليـا شلـعـت وجـالـك صْـيـاح وطْـيـاح
كـنّــك وكـــنّ الـلــي ذبـحـهـا وفـقـهــا
وصـف الاصـيـل الـلـي لـيـا لــز طـفـاح
هــــذي تـوطـاهــا وهـــــذي فـهـقـهــا
عـن بعـد ( حـر ) ولا تقاربـت (سـراح)
وان جيت (عبد) اضنى (الحرار) وعتقها
واخطـا عليـك مْسمـي الصقـر يـا صـاح
الـحــر وانـــت الـحــر لــلــي فـرقـهــا
وشـلـون حــر وجــذب راســه بْمـلـواح
عيـشـه عـلـى كــف الـرجـال وْعـرقـهـا
وانتـه سنـدك عْضـود وصْعـود وجْـنـاح
وحــداد ســـم الـطـايـره فـــي شنـقـهـا
مـــا ذلّـــك الـبـرقــع ولا ردّك صْــيــاح
ومـن حيـث مـا تبغـى مـع الكـون سقهـا