يابنت وينك عن حبيبٍ يناديك
من يوم غبتي والالم مكتسبني
يابنت انا ميت مشاعر تحاتيك
متى على الله ياحياتي تجيني
قلبي نبض حبك مشاعر وانا اغليك
ياللي انا من دون وصلك سجيني
اواه ياقلب جرحته وانا ابكيك
مدري متى يابنت وصل يحيني
ليتك تشوف ليا لفتني طواريك
اصيح بأعلى الصوت وينه وويني
وارجع ارد الصوت واصرخ واناديك
وينك تراني صرت عقبك حزيني
مير البلا لا شفتني من اعاديك
وكرهتي اسمي ياغلاي الثميني
وش حيلتي لامن كرهتي وانا ارجيك
زاد التناقض بالمشاعر ونيني
هذا وانا سيفٍ يهابه معاديك
تركتني لهمٍ وحزنٍ دفيني
يابنت عودي ياعسا الله يخليك
عودي عسا عمري بقربك يزيني
عودي لقلبٍ عذبه زود طاريك
لامن طرالي تذرف الدمع عيني
واحس انا بنارٍ لهبها من يديك
تحرق وانا دمعي يعاتب سنيني
الجرح ينزف والطعن صار بايديك
والخنجر المسموم مزروع فيني
حتى الامل دايم اشوفه بعينيك
مات الامل والحين ربي يعيني
وموتي انا كانه من الهم ينجيك
هذا انا وهذي يدك واذبحيني
هاتي الخناجر واطعنيني بياديك
واحلف انا ما اقول لا تطعنيني
ولامن خلصتي وشفتي انه بيرضيك
ابكي على قلبٍ سكنتيه فيني
لانه صعب قلبٍ يحبك ويغليك
مثل الغلا اللي كان بينك وبيني
وابطلبك ياجعل ربي يخليك
ثوبك يغطيني قبل تدفنيني
:
كنت هنا