عشت التجارب ياعرب عرض في طول
واعظم نتائج هالتجارب برودي
اسج نفسي عن ردا الهرج والقول
واصد عن هرج يعل الكبودي
حيث البشر فيهم مخافيف وخبول
وفيهم ضعيف لاحشمته يزودي
وفيهم صناديد على الحق وعدول
في عدلهم مال للظليمه وجودي
والعذر منهم ياعرب دوم مقبول
والطيب فيهم مايصيبه جحودي
وبعض العرب لوكان له هرج معسول
باتفه سبب ينكث عليك العهودي
ماكنك الا معرفة شخص مجهول
ولا يعدك في خصامه لدودي
ينسى مواقف ماضي حولها حول
سهران لاجلك والخلايق رقودي
واليوم يطعني بخنجر ومسلول
ويبحث ورا هرج بلا منه فودي
الوليد