ً
ً
ودي اقول خلك اكبر من وظائف مثل كذا
لانها لا تغني ولا تسمن من جوع

يعني كم الراتب !
ثلاثه اربعه حتى خمسه وسته الاف
على بالك تكفي !!
فواتير .. كهرب .. ماء .. ايجار
بنزين .. متطلبات البيت .. الخ

ودي اقول بس انت وقرارك ورغبتك ..

نجي لسؤالك هل تتوظف ام لا ؟
قبل اجيبك ليت اعرف سبب عدم استمراريتك في الوظائف!!
لان معرفة سبب عدم استمراريتك في الوظائف راح يساعد
في الاجابة على سؤالك ..

بمعنى لو قلت انا انسان ما احب الدوام ودائم اغيب
او قلت انام دايم واتاخر عن العمل
او قلت راعي مشاكل وما اسمع للمدراء
واللي براسي اسويه
او قلت الرواتب قليلة جداً ولا تكفي

كلها لها حلول وبسيط امرها



من خلال سؤالك اتوقع تخاف تترك الوظيفة الحكومية
مثلما تركت سابق الوظائف ..
وودك نقول لك توظف عشان تقنع نفسك بإنك راح تتغير
او يمكن ما ودك نقول توظف
عشان تبقى على نفس نظامك السابق

لكن ليه انت قاعد عند ذا النوع من الوظائف !!
ليه ما تشوف وظائف افضل وتناسب ظروفك
لا تقول مافي وظائف.
انت اسع بكل ما فيك
وقدم ملفك بكل مكان
وشوف لك معارف ووسايط
وادع الله آخر الليل ولكل وقت
ان يرزقك من حيث لا تحتسب
ويغنيك عن الناس ويكفيك
المهم لا تقعد كذا بس
واكبر انجازاتك حراس امن

اذا عندك شهادة ثانوي مثلا
فلا تقتل مستقبلك بمثل هذي الوظائف
اما اذا ماكان عندك شهادة فخلاص توظف
وتوكل على الله ..

الحكومية تختلف عن غير الحكومية
لان فيها امان وظيفي
لكن رواتبها وعلاواتها اقل من الشركات

المهم انتبه لنفسك والحق على عمرك
وبلاش تضيع ايامك وحياتك
في التنقل من وظيفه لاخرى
لانك لو تعودت على كذا
ما راح تكوّن مستقبلك
ولا راح توفر لك قيمة سيارة حتى
ولا راح تقدر تتزوج او حتى تبني بيت

نصحية من اخوك
خل نظرتك جادة بالنسبة لمستقبلك
وكن حازم مع ظروفك ومع نفسك
واترك شلل الاستراحات واصحاب الفلات

ثم الى متى وانت حدك بس حارس امن !
ما فكرت تواصل دراستك مثلا
ما فكرت تطور نفسك
ما فكرت تدخل في تجارة
ولو كانت بسيطه

على طاري بسيطة
اظن تمر كل يوم وليل على اللي يبيعون على الطريق
شاهي جمر .. بيتزا .. معجنات .. ووو الخ
وش رايك فيهم !

لو قلت لك بان منهم من بنى بيت من ذا الشغله
اظن ما راح تصدق !!
لكن حقيقي كونوا انفسهم وستروا احوالهم
وزاد دخلهم وتعلموا كيف ينتجون ويستثمرون

كلنا نقدر نسوي مثلهم ومو عيب نبيع
العيب يوم نهين انفسنا ونبذل وجيهنا
عند اللي يسوى واللي ما يسوى
عشان يسلفنا الى اخر الشهر

الشغل مو عيب ابداً

يمكن تقول طيب هي نفس وظيفة حارس الامن !
واقول لك لا فيه فرق السماء عن الارض
اللي يبيعون احرار
وحراس الامن عبد للراتب
اللي ينتظره اخر الشهر

اللي يبيعون يتطورون
وتلقاهم بعدين في محلات كبيرة
حراس الامن " محلك سر وللخلف در "
والراتب نفس الراتب لا زيادة ولا شي

اللي يبيعون اذا ما زاد دخلهم كل يوم
فهو يزيد كل اسبوع وكل شهر

عموماً طولتها وهي قصيرة
لكن ودي تفكر بمثل ما قلت لك
وتترك التقوقع على افكار متوارثه
وافكار سريعة الاشتعال سريعة الانتهاء
قصيرة الحلم والاجل ، متواضعة المقام


اسال الله ان يوفقك ويسعدك وييسر امورك

ِ