ادراكنا للأخطاء بيختلف جدا من شخص لاخر..
وحتى من موقف لآخر بالنسبة لنفس الشخص..
فيه حد ممكن يفهم لوحده انه غلطان..
وحد بيفهم لما حد يقوله انه غلطان..
بس فيه ناس مش بتستوعب خسارتها غير بعد ما تشوف خسايرها بعينها..
والاسوء انه فيه ناس حتى مش بتقدر تدرك ان خسايرها ديه مرتبطه بأخطاءها.. بتلوم اي حاجه تانيه.. زي ما يكونوا فاقدين القدرة على ربط المسببات بالنتايج..
يا ابني ما انت عملت كذا فطبيعي يحصل كذا... لا لا لا ملهاش دعوه..
ناس كده تحس انهم محتاجين ياكلوا علقة موت مثلا علشان يفهموا انهم غلطانين..
والاسوء على الاطلاق.. اللي مبيعرفوش ابدا هما غلطانين في ايه.. ولا غلطاتهم دي وصلتهم للوضع السئ اللي هما فيه ازاي.
الحاجه الكبيره اللي مرتبطة بإدراك الاخطاء.. هي قدرة الشخص على التعلم وتطوير ذاته وتحسين اداءه في الحياة..
وبناء عليه.. بدون مرحلة ادراك الاخطاء.. مفيش حاجه فيك كشخص بتتصلح.