*
*
هنا انكتبت بدايتنا وبدينا
ولاني عارف شلون انتهينا
بدون شعور جيت الدرب هذا
طريقٍ فيه ياما قد مشينا
طريق أول لقى كان يتمادى
تصبرنا وهو طوَّل علينا
تخاصمنا به خصام الأحبة
وتراضينا به وهو طار فينا
طريقٍ ممتلي ذكرى و لهفة
شهد دمعاتنا و عناق ايدينا
يودي للمكان اللي نحبه
مكانٍ كان للعشاق مينا
مكانٍ بين جدرانه سمانا
نبيه و صار من تالي يبينا
وصلته دون وعيْ وشفت حاله
تغيّر حيل عن يوم التقينا
على طاولته غبار وبقايا
من آخر مرةٍ منه سرينا
تصدق كل جدرانه تشرَّه
شلون سنين مرت من جفينا
أحس الطاولة تزفر بحرة
تحرتنا نجي لكن ما جينا
ومجلسنا بعد ماهو مصدق
بيجي يومٍ وبيفضى من حدينا
تعبت وقمت مدري وين أبهرب
أغني "يالله يا قلبي سرينا" !
أغني يالله يا قلبي ولا أقوى
أكمل .. "ضاقت الدنيا علينا" !
*
*
أنا فداهم