القواعد الخمس و العشرون لركوب الاتوبيس (في القاهره.. و على المقيمين خارجها مراعاة فروق التوقيت)
1. اعرف هتركب انهو اتوبيس.. مش معنى انه مكتوب عليه المكان اللي انت رايحه انك تنط فيه و خلاص
2. إسأل هو رايح المكان اللي انت عايزه ولا لأ. . خط سير الأتوبيس ممكن يتغير بمزاج السواق.
3. إتأكد ان السواق فهم انت سألت على إيه و انه رد عليك و هو مركز مش هز راسه و خلاص (خليك غتيت)
4. فيه اتوبيسات بتعدي على رأس الرجاء الصالح قبل ما توصل مكان ما انت عايز.. بلاشها.. هتكره نفسك و الدنيا على ما توصل
5. لو انت جديد في ركوب الاتوبيسات.. اعتبر اول كام مره رحلات تعليميه..
6. الصبر.. الصبر.. الصبر...
7. سواقين الاتوبيسات ميعرفوش اوي ان فيه حاجه اسمها على جمب..
8. لو عايز تنزل في محطتك تقف ع الباب ( اللي قدام لو هو ببابين) و تقوله على جنب يا .... (اي حاجه غير يا اسطى.. لو عايز تنزل سليم).. الكلام ده قبل محطتك بمحطتين مثلا.
9. اسامي المحطات في مصر لا تمت للواقع بصله.. و فيها حوارات عجيبه و مسليه.. ركز معاها.. هي مسليه فعلا.
يعني مثلا هتلاقي محطه متسميه على اسم محل أو صيدليه كانت موجوده يوما ما.. امتى بقا الله اعلم.. بس اغرب واحده لقيتها لحد دلوقتي اسمها المطب.. اه و النعمه.. في بلد كلها على بعضها مطب كبير اصلا.. و المسخره كمان ان الشارع اتقلب يعني غالبا مش هيبقى فيه مطب.. بس المحطة اسمها إيييييييه؟؟؟ ايوه.. اسم الله عليك.. المطب
10. حسك عينك تتخيل ان ممكن تشرب حاجه في الاتوبيس.. حتى لو جايب معاك غيار
11. نرجع لسواقين الاتوبيس.. انت هتلاقيهم شبه البني آدمين بالضبط.. لا تخرج قبل ان تقول سبحان الله.. بس مع الوقت هتقدر تطلع الإختلافات.. إنجوي
12. إياك ثم إياك تلاقي حد بيرغي و ترد عليه.. اخرك هز راسك.. و لو السؤال ميتجاوبش بهز الراس.. متعملش اي رد فعل.. لو انت رايح مشوار هتصدع قبل ما توصله.. لو انت مروح فأنت غالبا مصدع خلقه نش ناقص.
13. الستات التخينه(اوي ) اخطر ناس ممكن تقف جنبها او وراها او قدامها في الاتوبيس.. واحده طلعنا بنتها من تحتها بأعجوبة. . و دي بنتها.. ضناها يعني
14. ياريت بلاش كعب (الكلام للبنات) لو اضطريتي تقفي هتتبهدلي مراجيح
15. الناس بقا اللي لسه فاكره ان فيه حد بيقوم لحد.. بلاش تعلي سقف طموحك اوي.
16. سواقين الاتوبيسات مقتنعين ان دايما الاتوبيس فاضي ورا... متصدقهوش.. شوف بعينك و متدفعش غير لما تلاقي على الاقل مكان لرجليك الاتنين مش رجل واحده ( اه هما بيفترضوا ان طالما فيه مكان لرجل واحده يبقى فل اوي )
17. نفس اللي مقتنعين ان الاتوبيس فاضي ورا.. بيبقوا مقتنعين ان فاضل 10 دقايق و نوصل.. إسأل الناس.. متسألش السواق
18. شغلة التباع بتنحسر في 4 حاجات.. يجعر.. يحشر الناس جوه.. يلم الفلوس.. يحاول يخلص من اللي جوه في اقرب وقت ممكن.. تاني.. متسألوش أنزل فين.. إسأل الناس
19. اعمل استطلاع رأي شوف احسن مواصله بتروح المكان اللي انت رايحه.. بس ابقى جرب الاتوبيس.. فيه شوية مهارات كده هتتعلمها فيه مش هتتعلمها في غيره ( اهمها التوازن) و فيه شوية شخصيات كده هتقابلها فيه برضه ممكن متقابلهاش في غيره.
20. لو انت بتطق من الأغاني الشعبي.. احب ابشرك.. معدلها في الاتوبيسات اقل كتير من الميكروباص. . اركب اتوبيس
21. سواقين الاتوبيس فاكرينه تكتك.. إياك تركز مع الطريق خاصة لو بتعرف تسوق.. هتتهبل قبل ما توصل
22. ممكن تلاقي نفسك فجأه في مكان متعرفهوش (زي حالتي من شويه) ملكش دعوه.. مسيرك هتوصل
23. لو انتي بنت.. زعقي لو حد تصرفه مش عاجبك.. و لو حد من اللي عندهم تسلخات قعد جمبك ( لو عرفتي تقعدي اصلا) قوليله يلم رجله.. و لو تعرفي دكتور جلديه اديله نمرته
24. الأدب بتاع ثانيه لو سمحت.. و من فضلك انزل ده مش بينفع
25. حد يعرف الاتوبيس ده رايح فين؟؟؟؟؟