بتفتكر و انت هتشتغل إدمان انك داخل على مجال مش هتتعاطف فيه مع الناس اوي
بس كل كام يوم بتلاقي حاله تعدي عليك توجع قلبك اوي
لا انت عارف تلوم العيان ولا اهله ولا اي حد
لا انت عارف تصب غضبك ع النظام اللي خلى المخدرات في البلد متوفره اكثر من السلع الاساسيه
ولا على المجتمع الهش اللي قيمه قذره و مبقاش عارف يربي ولا يراعي عيال متعرفش هما بيخلفوها ليه اصلا
ولا على ظروف عجيبه بيتحط فيها ناس متقدرش اطلاقا تعتبرهم جناه مهما عملوا
متقدرش غير انك تحاول تساعدهم على اد ما تقدر
و تحاول اوي تمسك دموعك قدامهم
اكتر حد وجع قلبي بجد قابلته امبارح
نفسي بجد اقدر اساعده
طفل متديهوش بالشكل ولا الحجم 14 سنه رغم انه قرب يكمل 19 سنه
عمرهم ما كشفوا عليه علشان يعرفوا ليه حجمه صغير كده
و هنا لو اي حد من زمايلنا يقدر يساعد يبقى شكرا جزيلا
و الفكره ان مين اصلا هيكشف عليه؟؟؟
امه ماتت في حريقه و هو عمره 6 سنين
و ابوه وقع و هو في الشغل في محاجر الرخام و هو عنده 12 سنه
و عمته اللي جايه معاه شكلها اغلب من الغلب
الولد بيشتغل في محاجر الرخام من 8 الصبح ل 5 بالليل
بيركب 4 مواصلات لحد الشغل
حاليا مدمن هروين
حاليا جي يبطل علشان بيخرب سمعة اخواته البنات
واحده متجوزه و مش عايز يخرب عليها
و التانيه مش هتتجوز حد كويس طالما ليها اخ مدمن
ده كلامه
مهما حكيت مش هعرف احكيلكم كمية القهر اللي في عنيه
مهما وصفت مش هعرف انقل صورة الألم اللي متراكم على قلبه طول سنين حياته
مهما عشت مش هنسى شكله و هو مش عارف ميعيطش و هو بيتكلم معايا
مفيش حل سحري ليه او لغيره
مفيش قدام كل دكتور فينا بيقابل حالات زيه و اسوء غير انه يعمل كل اللي يقدر عليه
شغلتنا لو كانت مش سهله.. يبقى مش سهله بس علشان مواقف زي دي..