كل حاجه في حياتك بتتمركز حوالين أخذ القرار و تنفيذه
ببساطه كده
هما مرحلتين
لما تلاقي نفسك واقف مكانك مش بتتحرك
يبقى انت يا إما مش عارف تاخد قرار
او مش عارف تنفذه
لو لقيت نفسك بترجع لورا...
يبقى خدت قرار غلط..
او خدت قرار صح و بتنفذه غلط.. يعني الطريق اللي ماشيه مش الطريق لهدفك
لما تلاقي نفسك بتنجح و بتطلع لقدام.. يبقى انت عملت الاتنين صح..
خدت قرار صح و اخترت طريقه صح تنفذه بيها.
الفكره بقا في كل مرحله لوحدها. . إيه اللي بيوقفنا فيها
ايه اللي بيمنعنا ناخد قرار!؟؟؟؟
خايفين.. مش فاهمين. . مش عارفين نقيم الموقف او نتايجه... معندناش معلومات كفايه.. ........
ساعات بنبقى واخدين قرار.. ببساطه كده عارفين كويس ايه الصح اللي المفروض يتعمل.. بس مش قادرين نبتدي بالتنفيذ..
كده تبقى مشكلتك في الخطوه التانيه.. تنفيذ القرار
اهو دي بقا بتحتاج حاجتين مهمين اوي
اولا: قلب جامد شويه.. ترمي خوفك و قلقك وراك.
ثانيا: تبقى عارف رايح فين و إزاي.. يعني يبقى عندك خطه و خطوات واضحه هتمشي عليها.. هتساعدك كتير تغلب خوفك.
خلي بالك.. مش شرط يبقى عندك رؤيه واضحه لزمن طويل اوي.
عادة في النقلات الكبيره بتبقى القصه قصة الأنسب دلوقتي.. و التعامل مع المتغيرات اللي تجد على حياتك.
و خلي بالك كمان ان الظروف مش هي القضيه.. ديه مجرد جزء من المعطيات اللي بتدخلها لمخك علشان يحللها
بدليل ان كذا حد في نفس الموقف و نفس الظروف هياخدوا قرارات مختلفه و ينفذوها بطرق مختلفه.
متخافش من الفشل.. متخافش تغلط
كل الناس بتغلط و بتفشل و بتحتاس و بتوه
كل المهم انك تتعلم..
اتعلم و هتبقى أحسن.. ده أكيد