المفروض
واحده من اسوء الكلمات اللي قابلتني في حياتي
المفروض
كام حاجه ضاعت مننا بسبب المفروض
كام سنه ضاعت هدر علشان المفروض
المفروض
مين اللي فرض ام المفروض ده؟؟
و حد وقف سأل بعدها الدنيا كانت احسن ولا اوحش قبل المفروض؟
المفروض
كلمه مفيش وراها عادة غير أحلام و ايام بتضيع
من أكتر الكلمات اللي كرهتها في حياتي
المفروض
لما حد يجيلك بفرحه
متردوش
متكسرش فرحته
حتى لو عندك 100 تحفظ على قصته
سيبه بفرحته
خلي كلامك بعدين
محدش فينا عارف هيفرح تاني إمتى
سيبه بفرحته
خلي أفكارك و اعتراضك و تحفظاتك بعدين
محدش بيلاقي الفرحه كل يوم
سيبه
ده احنا ياما بيعدي علينا زمن بنحلم بريحتها حتى
متخسرش ناس كويسه في حياتك
حتى لو مش إصحابك القريبين
متخسرهومش
طب إزاي؟
1. متجيش على ناس مستحملاك علشان بتحبك
2. متسحبش من حد اكتر من رصيدك عنده
الناس زي الحصاله او زي رصيدك في البنك تاكد ان ليك عندهم حد إئتمان. حد اقصى يعني ممكن تسحبه منهم
و لما تحسه بيقل او بيفضى شوف طريقه تملاه بيها
3. لما تبقى مرتاح او مبسوط في علاقتك بحد أيا كان إسأل نفسك
يا ترى هو كمان مرتاح؟
هو كمان العلاقه دي إيجابيه بالنسبه ليه؟
و لو كانت الإجابه لأ. . فكر تعدل الكفه إزاي
4. متنهيش علاقه علشان سوء تفاهم
لو مش فاهم كويس إسأل
لو مش متاكد من المعنى إسأل
على الاقل قول للي قدامك ان اللي فهمته كذا... هو ده قصدك؟
5. متاخدش وجود حد في حياتك مسلم بيه
كل الناس ممكن تبقى ماضي في حياتك
شوف مين هتندم عليه لو بقى ماضي
6. حافظ أوي على اسرار الناس ... خليك أد ثقتهم فيك
7. شوف إيه اللي رابطك بالناس و حافظ عليه... محدش فينا بيحب يعيش لوحده
8. خليك انت الحد اللي الناس تحب تصاحبه
9. متسبش حد في زنقه
10. متجيش على حد في ضعفه
11. متديش حد اكبر من حجمه
12. متديش حد اقل من حجمه
13. متغيرش مبادءك علشان حد.. لأن دي برضه طريقه تخسر بيها الناس.. لو هتتغير إتغير علشانك مش علشان حد
كفايه كده النهاردة