لو سألتك إيه المسؤول الأول عن الإحساس بالحب والألفة والحميمية بين الزوجين هتقولي ايه (كلمة واحدة جامعة شاملة ) ؟
ممكن تقولي الشعور بالحب .. أساسه التعبير نفسه عن الحب ..لو موجود هحس بالحب لو مش موجود مش هحس بالحب ..
ودا مش خطأ لكنه غير دقيق.
هناك شئ إن لم يوجد .. مهما قلت و عبرت وعملت مالوش لازمة .. كأنك بتنفخ في قربة مقطوعة.
ألا وهو (الأمان والثقة)
و الشعور بالثقة لها أكثر من شكل .. كلهم مطلوبين ..
✨ الثقة أحيانا تعني الشعور بالأمان العاطفي يعني شريك حياتي أو شريكة حياتي شخص ملتزم بعلاقتنا مش مراهق كبير بتوديه و تجيبه أهواء أو إغراءات من آخرين أو أخريات.
✨ و الثقة أحيانا تعني إن شريك حياتي في ضهري لو وقعت هيسندني مش هيتخلى عني
✨ و الثقة جزء منها إن شريك حياتي مش شخص كداب و ملاوع و غامض .. بل على العكس صريح و منفتح و واضح.
✨ و الثقة أحيانا معناها إن أنا متجوزة شخص مسؤول .. أو شخصية مسؤولة .. مش هيسيبني لأجل خلافات ممكن تحصل .. أو تحديات في حياتنا .. بل هيتعامل معاها معاملة الكبار الناضجين.
✨ و الثقة أحيانا معناها .. إن شريك حياتي شخص مش هيعايرني بنقاط ضعفي وقت الزعل أو يفضحني أو يظلمني .
لو الثقة دي موجودة 🡰 هيبقى في شعور بالأمان 🡰 ومتى ماكان في شعور بالأمان .. أقل كلمة و أقل تصرف ممكن توصل إحساس عظيم بالحب و الحميمية.
يعني التعبير عن الحب وحده غير كافي
الأمان والثقة هم الأساس