في نظرية إسمها Negativity threshold يعني سقف تحمل السلبية
وهي قد ايه بتكتم جواك مشاعر سلبية تجاه أمور و تصرفات و أوضاع بتضايقك .. لحد فين بتستحمل ..
لو سقفك تحملك عالي فانت بتراكم جواك كتير لفترات طويلة من الزمن اعتقادا منك إن دا هيخلي حياتك الزوجية أسعد وأقل في المشاكل
و أقل اصطدامات و خناقات و نكد
ويؤسفني أقولك إن دا إعتقاد خاطئ
د.#جون_جوتمان (عالم نفس ومتخصص في دراسة الأزواج من 50 سنة) وجد إن اللي بيعمل كده بينفصل مشاعريا مع الوقت وبيجي مرة وينفجر و الإنفجار دا بيبقى صادم للطرف التاني و بيعمل فجوة صعبة بسبب إحساس طرف بالغضب والطرف الثاني بالرفض ومابيقدروش يحلوا كل الأمور اللي طفت ع السطح فجأة كلها مرة واحدة فدا بيخليهم يفضلوا بعاد و عندهم شبه يأس في الإصلاح
إنما اللي بينفس عن مشاعره المختزنة أول بأول كل فترة .. دا في حد ذاته تواصل عاطفي وبيقدروا كشريكين يعالجو الأوضاع اللي مش عاجباهم بدري .. فمابيبقاش جواهم عتب أو غضب مختزن تجاه بعض وبالتالي تواصلهم بيبقى عاطفي و سلس و صافي و عندهم إقبال على بعض.
نفهم من كده إن نسمح لبعض نشتكي لبعض أول بأول و نعالج الأمور بدري
آه .. بس في ملحوظتين:
✨ طريقة التعبير عن المشاعر و اللوم و الغضب و العتب هي اللي بتنجح عملية التواصل والتنفيس عن المشاعر المختزنة .. و بتحقق هدفه .. وفي المقابل و في نفس الأهمية كذلك طريقة الإستجابة للمشاعر دي
طريقة التعبير لازم تكون هادية غير انتقادية لأن النقد بيحفز رد فعل غير متعاطف .. طريقة فيها وصف لمشاعرك إنت و احتياجاتك مش طريقة هجومية أو إتهامية .. و تأكد على شريككإن هدف الفضفضة دي اننا نبقى مرتاحين مع بعض و صافيين لبعض و مايبقاش في بينا حواجز مالهاش لازمة ..
أما طريقة الإستجابة تكون بأريحية وماتتخدش بشكل شخصي قوي وماتكونش استجابة هجومية أو دفاعية كذلك.
تاني حاجة .. طبعا وأكيد جه في دماغكم (إزاي؟ دا التغافل رحمة وهو اللي شايل العلاقات)
هقولك صح .. دا التغافل المحمود .. في الحاجات الهايفة فعلا اللي ماتستاهلش تقف عندها و اللي لو عديتها انت كسبان بالفعل راحة دماغك و مش هيأثر على حالتك النفسية .. زي نسي / نسيت تعمل حاجة .. كسل / كسلت في حاجة .. تجاهل أو تقصير طارئ بسبب الإنشغال في حين إن دا مش طبع شريك حياتك ..
إنما في تغافل غير محمود .. زي التواصل المهين اللي بيوجعك .. السخرية و التقليل منك مثلا .. التقصير في إحتياج مهم بالنسبة لك.. التجاوز في الحدود المتفق عليها مع الجنس الآخر .. إلخ .. دا لو عديته من بره هيفضل قاعد جواك بياكل فيك و في العلاقة .. و انت متخيل إن كده انت بتخدم علاقتكم . و في الحقيقة انت سايب السوس ينخر فيها من جوه..