في موضوع مش واخد حقه خالص في العلاقات الزوجية .. مع إنه مهم جدا
ألا و هو ال Balance
- في ايه
- Balance في التعب
في توزيع المسؤوليات (العمل و كسب الرزق - الواجبات المنزلية - التربية )
طبعا متخيلين إن هقول الست بتتعب أكثر و بلا بلا بلا
لا
أحيانا الراجل بيتعب أكثر من الست
و أحيانا الست بتتعب أكثر من الراجل حسب معطيات حياتهم و ظروفهم
فالموضوع نسبي تماما فإحنا هنا مش جايين نقول مين بيتعب أكثر من مين .. الإتنين تعبانين
إحنا جايين نقول إن لازم يبقى في balance بس
عدم وجود balance مشكلة كبيرة أكبر مما تتصوروها
لما حد بيشيل عبئ أكبر من التاني لأي سبب
بيكون مرهق بدنيا ونفسيا وساخط وغير راضي عن حياته وكثير الشكوى والنكد .. ودي حاجة مش هتخليه شريك جذاب لا شكلا و لا شخصية لشريكه . . آدي أول حاجة هفقد جاذبيته ..
تاني حاجة كثرة مهامه هتخليه في أوقات كثيرة .. غير متاح عاطفيا أو جنسيا و دا بيضرب في ركنين مهمين جدا في زواجه .. الإشباع العاطفي و الجنسي .. اللي هم أصلا الهدف من الجواز
و في المقابل الطرف التاني الأقل عبئا هيتعرض لرفض كتير و ربما ياخده على إنه رفض شخصي وربما يحس في أوقات تانية ان شريكه بيقضي معاه وقت .. أداء واجب مش أكثر لكنه في الحقيقة مش موجود .. فيبدأ يبعد و يبني حاجز /أو يعبر عن غضبه ويعمل مشاكل و دا هيزود الضغط على الطرف التعبان أصلا عشان يرضي الطرف اللي بيشتكي من قلة الإهتمام / أو يحاول سد إحتياجاته بوسائل أخرى .. أو كلهم مع بعض
ودي تاني حاجة انشغالك أو انشغال شريكك طول الوقت .. و عدم وجود وقت يرتاح و يشحن فيه .. هيخليه مش قادر يلبي إحتياجات أساسية في علاقتكم الزوجية.. و اللي هيعود على العلاقة بشكل سلبي جدا
واحد و اتنين بيحصلوا في الأعم الأغلب من الزيجات الغير متوازنة في توزيع أعبائها و خصوصا بعد مجئ أولاد
تالت حاجة(ممكن تحصل و ممكن لا يعني بدون تعميم )
بالنسبة لطرفين عندهم طموحات .. فعندنا دلوقتي طرف عنده مساحة ولو صغيرة متاحة و طرف معندوش لأن يومه مزحوم
الطرف اللي عنده مساحة هيتابع طموحاته هيتقدم قليلا أو كثيرا
اللي عنده طموح ومعندوش مساحة .. هيفضل في مكانه .. و هو حاسس بالسخط و الغيرة
و بتراكم الشهور و السنين و باستمرار نفس الظروف .. هتظهر فجوة في جانب ما بين الإتنين سببها إن واحد قدام وواحد لسه في مكانه
وبسبب الفجوة دي هيبقى في طرف شايف نفسه أقل حتى لو الطرف التاني عمره ما قصد يبصله إنه أقل .. هتلاقي بقى عندنا حساسيات وإحساس بعدم الأمان .. وطرف شايف إن التاني بيستقله و انه ممكن يكون معدش مناسب ليه .. فملاحقة و نكد و غيرة و شك و تمرد .. فانسحاب من الطرف التاني أو ردود أفعال غاضبة و عنيدة و نلاقي نفسنا في دوامة هابطة سلبية .. واحنا متخيلين إن السبب هو الشك او عدم الثقة في النفس ..
في حين إن السبب في الأساس إن الأعباء و الضغوط كتيرة و كان في عدم تكافؤ في توزيع المسؤوليات و المهام و الأعباء .. وواحد رامي أكثر الحمل على التاني سواء يقصد أو مايقصدش.. فظهر عندنا النتايج دي ..
أو إن هو دا العرف او هي دي "جنوسية الأدوار" .. كل واحد بقى يشيل شيلته.
جنوسية الأدوار على فكرة أذت أكثر ما فادت .. الفكرة مش جنس إيه المفرض يعمل إيه زي ما العرف بيحدد
الفكرة إن يبقى التوزيع متكافئ و اللي أشطر في حاجة يعملها .. واللي شايف التاني شايل كتير يخفف عنه
دا الأصلح.
ال balance في توزيع الأعباء بين الزوجين مهم جدا .. بتسيبلهم وقت يهتموا ببعض .. و يهتموا بنفسهم و نموهم الشخصي .. و بتقيهم من مشاكل بتظهر بعدين .
مفيش طريقة معينة ستاندارد تحقق توازن تمشي مع كل زوجين لأن ظروف و قدرات كل اتنين مختلفة .. بس لو في اتنين بيعانوا من المشكلة دي .. لازم يشوفوا هيقدروا يريحوا بعض إزاي عشان علاقتهم تبقى أحسن.
مين متفق و مين مش متفق؟
مين شاف وضع من التلات أوضاع دول حواليه؟