منتديات مسك الغلا | al2la.com - عرض مشاركة واحدة

**الفيلسوف** · 09-16-21, 12:37 PM

قالك إيه
لما بنواجه موقف خطر حقيقي زي ان اكتشفت وجود حرامي في بيتك مثلا جسمنا بيفرز أدرينالين .. هو اللي بيديك الباور إنك تواجه الخطر دا أو تهرب منه fight or flight
نفس الشئ بيحصل لما بتحس بالخطر أو الهجوم النفسي في مشادة بينك و بين مديرك أو زميلك أو مراتك أو جوزك .. الجسم بردو بيفرز أدرينالين .. لكن في الموقف دا إنت مش هتضرب ولا هتجري !! فالإدرينالين لا يستخدم و بيفضل محتقن في جسمك .. و بيسببلك نوع من القلق و العصبية و تشتت التركيز طويل المدى
طب كده لازم نتخلص من الإدرينالين عشان نقدر نرجع لتوازنا الطبيعي تاني
فكان في مدرستين
مدرسة قالت الإسترخاء و التأمل و التنفس الهادي فلقوا ان دا بيهدي الكورتيزول(هرمون القلق بيفرز مع الإدرينالين لما نقع تحت ضغط) يعني بيديك شعور مؤقت بالهدوء لكن بيفضل الإدرينالين موجود في دمك.. لكن في حاجة بتوازنه.
و المدرسة التانية قالت .. المجهود البدني .. هو اللي هيقدر يستهلك الإدرينالين جذريا و هيبقى تنفيس صحي عن الغضب و الشعور بالتهديد و بالتالي هيستنفذ من جسمك وهترجع طبيعي ومتوازنو هادي
و بعدها ممكن تعمل تمارين تأمل و استرخاء.
الكلام دا بيفسر ليه الستات أحيانا بعد المشادات الزوجية لا واعيا بتقوم تجيب الشقة من فوق لتحت في وقت قياسي

أو ليه الرجالة أحيانا بتنزل تلعب كورة أو بتروح الجيم أو بتمشي مسافة طويلة
وعموما دا اللي بينصح بيه خبراء إدارة الخلافات الزوجية زي #جون_جوتمان .. أول ما تحس ان إنفعالك زاد بشكل مش هتقدر تسيطر عليه بعد النقطة دي و هيتحول لعنف لفظي أو جسدي .. لازم تبعد وتعمل أي مجهود بدني.
عشان تقدر في الجولة التانية تتكلم بهدوء (مهو الموضوع مانتهاش كده لازم يتحل ويتقفل مش هينفع يتساب مفتوح

والأمور تبقى تحت السيطرة و تعرف تحافظ على مسار الحوار .