الضمان والألفة والواقع والتراكم والإنشغال
خمس حاجات بيخلوا الحب يتراجع شوية بعد الجواز
1- الضمان إن خلاص اتجوزنا فمبقتش محتاج أثير إعجابك و أبذل مجهود كبير عشان أنال حبك
2- الألفة .. إني بالمعايشة ألفت مميزات شريك حياتي اللي كنت معجب و منبهر بيها قبل كده فبقت عادية و معدتش بشوفها ولا مقدر قيمتها زي الأول
3- الواقع .. اللي هو ظهور السلبيات و العيوب ومعايشتها .. وطبعا مشاكل التواصل اللي بتمثل الغالبية العظمى من المشاكل بين أي اتنين وبتهدم حلاوة أي علاقة .. ومشاكل الإختلافات الشخصية اللي بالتأكيد خيبت أملك قليلا و نقصت من جمال الصورة المثالية اللي كنت راسمها .. لكن في الآخر دا الواقع اللي هتقابله ولا مفر من ذلك
4- التراكم .. التراكم غير الواقع
الواقع المشاكل هتقابلها هتقابلها
التراكم بقى انت عرفت تحل المشاكل دي حل جذري ولا سبتها تتراكم بدون حل ولا أنهيتها بشكل غير عادل .. ملف مفتوح كان ممكن يتقفل و ينتهي و يتنحى عن طريقكم بدل ما يقف حاجز بينكم .. لو اعترفت بدورك في المشكلة .. لو إعتذرت .. لو سمعت و طيبت خاطر .. لو قلت كلمة حق ولو كان ذي قربى إلخ
5- الإنشغال .. و هو ضغط الحياة و متطلبات الأولاد اللي يكاد مابيسيبش وقت و جهد للزوجين يركنوا إلى بعض شوية و يشحنوا عاطفيا
طب إزاي نستعيد أو نحافظ على قدر جيد من الحب و متنفقدوش مع الوقت و المشاكل؟
نعمل العكس
تركز مع مميزات شريك حياتك و الحاجات اللي بيعملهالك عشان بيحبك .. أو حتى بيعملها عشان دوره بس بيعملها بحب و إخلاص .. إكتبها على موبايلك عشان تبقى أوقع في نفسك
تبذل مجهود عشان تعبر عن حبك .. و لو صغير .. عبر بالكلمة أو الهدية أو اللمس أو #الإستماع (تخصيص وقت) أو المشاركة أو الموقف الجدع .. اللي مقرأش كتاب لغات الحب الخمسة يقراه
تتعلم إزاي تتواصل .. إزاي تسمع و تشوف من مكان شريك حياتك .. إزاي تعبر عن إحتياجك ..إزاي تتحكم في إنفعالك .. إزاي تترجم كل مشكلة إلى الإحتياج المفقود اللي ورا المشكلة دي .. إلخ
التعلم جزء أساسي من رحلة ارتقاءك بجودة علاقتك الزوجية
لا تترك شيئ أبدا للتراكم .. اسمح ببيئة آمنة بينك انت و شريك حياتك #المساحة_الآمنة تعبروا فيها عن مختلف مشاعركم و خصوصا الغضب و اللوم .. استمع بدون رد .. بهدف ترك مساحر لشريك حياتك يخرج ما بصدره ليعود طبيعيا و بهدف رؤية الموضوع من وجهة نظره .. ثم خذ دورك بالحديث و شرح وجهة نظرك
اتبع إستراتيجية الإصلاح_السريع دايما . اعتذر فور ادراك الخطأ أو الإساءة .. افعل شيئا ما عند إدراك التقصير
حافظ على وقت يومي quality time مع شريك حياتك و ليكن الربع ساعة بتاعةكوباية الشاي اللي بعد الغدا .. الربع ساعة اللي قبل النوم
مجرد ربع ساعة في اليوم بدون موبايلات.. تحافظ عليكم emotionally_connected
بس و ربنا بيكافئ السعي بالتوفيق