طلقني
في الأعم الأغلب من الحالات مش تعبير عن رغبة حقيقية في الإنفصال .. دا تعبير انفعالي عن شعور بالرفض الشخصي أو العجز عن تغيير وضع ما .. أو تعبير عن رغبة في الهروب من الضغوط النفسية والمشاكل بس مش خلاص من الشخص نفسه .. رغبة شديدة في التغيير .. و في نفس الوقت جس نبض تشوف بيه مدى حرصك على علاقتكم مع بعض وهل المشاكل اللي بتمروا بيها خلتك تفكر في كده ولا لأ ..
- طلب الطلاق الحقيقي بياخد سيناريو غير كده تماما .. بيبقى طلب عقلاني جدا وعن إقتناع وبييجي بعد خطة مدروسة مش في موقف إنفعالي
وطبعا هي مش صح تتقال كل شوية و تراهني على حنكة الزوج و قدرته على إحتواء الموقف لأنك ممكن لا سمح الله ولا قدر تخسري الرهان و كمان لأنها بتفقد الرجل شعوره بحرص زوجته على العلاقة اللي بتجمعهم و دا كمان مؤذي ليه زي بالضبط ما هو مؤذي ليكي مهما كان فاهم إن الستات انفعاليين وبيطلعوا يطلعوا و ينزلوا على مفيش ... لكن مع الوقت و التكرار بيشك في ارتباطك بيه .. و تكرار الطلب دا بيدفعه إن هو كمان يعبر عن الإستغناء (بلسان حال يعني انتي مستغنية عني و أنا مش مستغني؟) .... وكده ركبنا الطريق لإحتمال مكنش مطروح "بجدية" أصلا في البداية !
محتاجين نتدرب على إمساك اللسان عن أي كلمة فيها طلاق عشان مابتجيش بخيـر حتى لو مجرد كلمة.