و بعد سنين تيجي الست تلاقي نفسها بتعمل المسقعة بحرفية و الباشاميل آخر طعامة وتلاقي نفسها دخلت مسابقة مين أحسن واحدة بتعمل الطبق الفلاني في العيلة وتبقى أقصى آمالها إن هي اللي تفوز باللقب دا..
لكن في قرارة نفسها حاسة إنها مابتعملش حاجة في الدنيا وإن إتقانها للمسقعة و شكل عيالها المسرحين دايما مانتشلهاش من الشعور دا (مع عدم التقليل من دور الست في البيت)
و تبص تلاقي جوزها بيتقدم في شغله وبيتطور وبيقابل ناس جديدة وبيعيش تجارب جديدة و بيسافر وإحساسه بقيمة نفسه بتزيد وهي محلك سر بالعكس بتفقد إحساسها بنفسها في ظل الروتين .. حتى لو عندها هوايات .. الهواية غير كافية لتغيير الواقع وإحساسك بيه.. هي فقط بتفصلك عن واقعك قليلا .. و تبص لصديقاتها تلاقيهم طبعا بيشتكوا من الشغل و ضغط الشغل و المدير ابن اللذين لكن بيتطورا وبيكتسبوا مهارات و خبرات جديدة عندهم إنطلاق في الحياة .. مهتمين بنفسهم لأنهم بيخرجوا للعالم كل يوم و لازم يجاروه .. عندهم معارف و علاقات .. و عندهم حتة استقلالية نفسية ودي مهمة بشكل لا تتخيلوه .. عندهم حتة إحساس بالأمان أكثر قليلا من احساسها هي بالأمان لأنهم قادرين يعتمدوا على نفسهم و عندهم خبرة يومية مع الحياة إدتهم ثقة أكثر في نفسهم وأمان إن مهما ساءت الأمور هعرف أتصرف .. و هي تبص على نفسها تلاقيها معتمدة بشكل كامل على زوجها .. ماديا و نفسيا .. تعتمد ماديا مش عيب .. لكنه مشكلة لو لا قدر الله حصل إنفصال .. إنما تعتمد عليه نفسيا دي مشكلة .. لأنها طبعا عايزة تحس انها بتعمل حاجة في الدنيا (الحاجة إلى تحقيق الذات) .. فهتستنى منه إنها يقدرها و يكافئها باستمرار ودا مابيحصلش باستمرار .. لكن الشغل ع الأقل بيديك راتب ودي مكافأة في حد ذاتها .. لو عندك مدير محترم بيدعمك و يشجعك و يمدح شغلك .. دي مكافأة نفسية عظيمة .. المهم في الآخر هي مش معتمدة على نفسها و جوزها يُفترض بيه إنه المصدر الأكبر لإشباعها النفسي (حاجتها الى التقدير و الثقة و إحترام الآخرين و تحقيق الذات و السعادة ) و ييجي في المرتبة الثانيةلإشباع إحتياجاتها النفسية أهلها والاتنين تلاتة اصحابها حسب ماهم فاضيين ليها .
وأحد المشاكل بردو اللي بقت مشهورة قوي عند الزوجة غير العاملة احساسها الزايد بالغيرة و الشك خصوصا اذا الشغل مختلط لأنه كما هو معروف عن أجواء العمل(إلا من حم الله ) إن هنطلب فطار مع بعض و جو الشغل كله هزار عشان مايبقاش جو تقيل و معقد و طبعا هنروح نجامل زميلنا أو زميلتنا مع بعض .. و اذا لزم الأمر في كلام في التليفون عشان نتابع المشروع الفلاني ورنة كل شوية وربما أي وقت .. كل دا بيعمل إحساس عدم راحة و غيرة في أفضل الأحوال دا إذا كانت الزوجة واثقة جدا جدا في زوجها يعني .. و بيخليها تتساءل هل ممكن يحصل استلطاف في ظل الجو دا ولا لا .. و دا بيعيشها في مشاعر عدم أمان دورية..
فأنا بصراحة دا رأيي الشخصي اللي مش لازم تاخد بيه لكن أنا بشجع أي عمل للمرأة .. حتى و لو من البيت .. بس أي حاجة تحقق بيها احساسها بنفسها وهويتها بجانب البيت والزوج و الولاد .. وأهو تحلل 20 سنة تعليم من عمرها و تحس بانها شخص يقدر يعتمد على نفسه و يعتمد الآخرين عليه .. وتزود مهاراته وخبرتها و ثقتها بنفسها وتعمل لنفسها علاقات و مجتمع صغير و تهدي احساسها بعدم الأمان .. و تخف الحمل من على زوجها شوية .. ودا انا بشجعه فعلا بعد سنين من معايشة تجارب شخصية وتجارب آخرين وحكايات في الانبوكس .. و دا طبعا لا يعني نهائي اني مابحترمش اختيار أي واحدة مش بتفضل تشتغل..
طبعا الكلام دا ينسحب على البعض ولا ينسحب على الجميع ...
ومن هنا انا من مناصرى انى الست تثبت نفسها ف شغلها مهنيا