منتديات مسك الغلا | al2la.com - عرض مشاركة واحدة

**الفيلسوف** · 10-16-21, 09:53 AM

الدفا والإشباع الاسري أحد أهم دعائم التربية السوية.
البيت اللي أفراده قادرين يتجمعوا وقادرين يحتووا بعض رغم إختلاف أفكارهم.... هو البيت اللي انحراف أفراده بيبقي صعب.
لو الطفل كبر شوية وهو مش حاسس بالإشباع في بيته ومش حاسس بالانتماء ليه.…بشكل اتوماتيك بيدور علي كيان بديل يحس فيه بالاشباع المفقود.. كيان الناس فيه بتحس بيه... ناس بيعرف يتكلم معاهم... ناس شايفينه حد كويس ومتقبلين شخصيته.... ناس بتقف معاه نفسيا وعمليا وقت أزماته .....بيدور علي الكيان ده في شلة صحابه... او في قصة حب مع طرف تاني....او في بيت من بيوت قرايبه.…وممكن جدا الكيان البديل مايكونش آمن
عاوزين تحافظوا علي ولادكم؟ .... حسسوهم بالاشباع النفسي من صغرهم ... وده أهم من إشباع حاجاتهم المادية.
الولد لازم يحس انه هو حد مقبول في بيت ابوه.... لازم يحس ان ابوه وأمه واثقين فيه وبيعتمدوا عليه...... لازم يحس ان ابوه وأمه بيسمعوه وبيقفوا جنبه لما يكون عنده مشكله.
البنت لازم تحس ان أهلها فعلا بيحبوها وأنها غالية عندهم....البنت بتشوف نفسها جميلة او مقبولة في عيون أبوها وامها واخواتها قبل ما تشوف كده في المرآية.
البيت اللي فيه الأب والام والولاد مفيش كلام بينهم غير عن الاكل والشرب والمصاريف ده مايبقاش بيت.... ده مجرد فندق او بنسيون.
البيت الدافي هو البيت اللي بتتقال فيه كلمة الحب بشكل طبيعي.... هو البيت اللي فيه الحضن مهم زي الاكل الشرب... هو البيت اللي الناس بتضحك فيه بصوت عالي.
هو البيت اللي بيتعمل فيه حفلة بسيطة بعد كل إنجاز بيقوم بيه حد من الاسرة... هو البيت اللي بيتقال فيه كلمة(شكرًا) و(براڤو) ... هو البيت اللي الناس فيه بتبوس دماغ بعض وبيتأسفوا لبعض لما يتصالحوا بعد خناقة حصلت بينهم ..هو البيت اللي بيتجمعوا فيه وقت الاكل والفسحة والمرض والصلاة والدعاء.
ولادنا لو ماشبعوش في بيوتنا .... هيدوروا ع الشبع والدفا بره