في بيوت الناس فيها ممكن تستخسر تبذل مجهود او وقت او فلوس وقت المشاكل .... بس عندهم إستعداد يعملوا كل حاجة وقت الطلاق وبعد الطلاق من باب الكبر والمكايدة
ممكن الزوج يبقى مكسل ياخد أجازة كام يوم عشان يغير جو هو ومراته عشان يهدي جو المشاكل شوية ويقربوا من بعض... بس بيبقى عنده إستعداد بعد كده ياخد أجازة عشان يروح المحكمة عشان قضية الطلاق او الخلع.
ممكن يستخسروا يدفعوا مئات الجنيهات عند إستشاري أسري او طبيب نفسي ... بس ممكن يدفعوا عشرات الالاف عند المحامين وقت الطلاق
في ستات بتفضل تدافع عن إهمالها لشكلها ووزنها طول فترة المشاكل قبل الطلاق... لكن ممكن تبدأ تروح الجيم والبيوتي سنترز وتعمل دايت بعد الطلاق عشان تبعت رسالة لطليقها ان حياتها بقت أحلى من غيره.
الزوجين ممكن يكسلوا يبذلوا مجهود في قراءة كام كتاب او في سماع شوية محاضرات عشان يطوروا حياتهم الزوجية ... بس ممكن يحفظوا قوانين محكمة الأسرة وقت الطلاق
بيوتنا غالية ... الحفاظ عليها بيحتاج مجهود ووقت وفلوس
ده مايمنعش ان في بيوت كان الطلاق فيها هو اقل الخساير ... لكن الكلام لا ينطبق على معظم البيوت اللي بيحصل فيها الطلاق في المجتمع في الفترة الحالية
في بيوت كتير كان يمكن إنقاذها بإمكانيات أقل بكتير من المجهود والوقت والفلوس اللي إتدفعوا بعد ما البيت إتهدم