عاوز تكسر زوجتك وأنت بتتكلم معاها أو وأنت بتتخانق معاها.. قارنها بواحدة تانية.
إسألها هو إنتي ليه مش زي فلانة؟ .. او إشمعني فلانة بتعمل كذا وانتي لأ؟
أحيانا الراجل وهو بيحاول يصلح عيب في زوجته أو حابب يعلمها صفة مش موجودة فيها... بيبقي مش عاوز يفضل يتكلم كلام عام ... فبيضرب مثال بحياة حد تاني او تصرف واحدة تانية عشان يوضح وجهة نظره... الطريقة دي كارثية.. لأن زوجتك بتفهم من كلامك إنك مش راضي عنها وإنك شايف فلانة اللي انت قارنتها بيها أحسن منها وطبعا ده بيستفزها وبيخلي محاولتك للتغيير محاولة فاشلة.
أحيانا تانية بيكون الراجل فعلا معجب بصفة موجودة في واحدة تانية..(ده مش مشكلة لأن في فروق فردية بين الناس).. المشكلة بقي إن مجرد إعجابك بصفة ظاهرية انت شوفتها في واحدة تانية يخليك تحس انها أفضل من زوجتك بشكل عام.. .وبيتولد جواك شعور بعدم الرضا عن زوجتك والشعور ده بيظهر في كلامك أثناءالمناقشات والخناقات..في الحالة دي لازم تعمل شوية خطوات:
١- لازم تعرف إنك متعرفش كل حاجة عن الست التانية دي ..وأنت متعرفش هي عاملة ايه في بيتها.. وإن ممكن يكون فيها عيوب إنت متقدرش تستحملها وإنها مفتقدة لمميزات إنت محتاجها.
٢- أقعد مع نفسك وأفتكر كل المميزات اللي موجودة في زوجتك ( ياريت تكتبها في ورقة) وإفتكر كل اللحظات الجميلة اللي بينكم... الخطوة دي هتعزز عندك شعور الرضا عن زوجتك .. قال النبي صلى الله عليه وسلم قال(( لا يفرك مؤمن مؤمنة، إن كره منها خلقا رضي منها آخر )) رواه مسلم.
٣- شوف الحاجة اللي انت عاوز تغيرها في زوجتك... وشوف هينفع ولا لأ .... لو (لأ...وهو ده الغالب) حاول تتعايش معاها وتتقبلها .. ولو (ينفع) أختار الطريقة المناسبة وحاول معاها من غير ما تكسرها.
٤- حاول كل فترة تكدب علي زوجتك وقولها انها أحسن واحدة في الدنيا.... وهي هتبقي عارفة انك كداب بس هتفرح بيك فرحة الدنيا والآخرة