معلش - عندك حق - أنا حاسة بيك - أنا معاكي
شكرا - تسلم إيدك - أنا مقدرة تعبك - إنت تعبتي فعلا النهاردة
زعلان ليه يا عم ؟ - عاملة إيه دلوقتي؟
هاقولك رأيي - خلينا نفكر سوا - أنا هاتصرف
ألف سلامة عليك - صحتك بالدنيا
وصلت ولا لسه ؟ - عملتي إيه في المشكلة اللي قولتيلي عليها ؟
احنا بنتجوز عشان حاجات كتير ... منها المشاعر اللي فوق دي
كلنا بنحتاج حد يدعمنا .. وإن حد يسأل علينا .. إن حد يقدر تعبنا ....إن حد يسقف لنا لما نعمل إنجاز ... وإن حد يقف جنبنا وقت الضعف والمرض والمشاكل ...وان حد يسمعنا و ياخد ويدي معانا ويونسنا
اي محاولة لتسفيه المشاعر دي او إهمالها تحت فكرة إننا مش فاضيين او المسؤوليات كتييرة او إن الكلام ده رومانسية فارغة ... ده معناه ان الجواز هايتحول فعلا لشوية مسئوليات تقيلة على شوية شد وجذب.
الشاب اللي داخل الجواز وهو مش عاوز يسمع مراته لما تتكلم .. ومستكتر يقول لها كلام حلو ... ومستكبر يساعد في مسئوليات البيت... ومش شايف ان له دور في تربية الولاد ... ولا عاوز يحمي مراته من أذى اي حد ... وشايف إن المفروض ان مراته تسمع كلامه في كل كبيرة وصغيرة وبدون مناقشة.... وشايف إن كل دوره في الحياة الزوجية إنه يجيب قرشين يديهم لمراته (ويا ريت تكون هي كمان بتشتغل عشان تساعده في المصاريف)
والبنت اللي داخلة الجواز وشايفة إنها مش مطالبة إنها تراعي جوزها وبيتها وولادها... وشايفة إنها مش المفروض انها تعمل أكل ولا ترتب بيتها وتنضفه (ولو عملت جزء من الحاجات دي بيبقى جدعنة منها كده) ... ولا تهتم بشكلها ونفسها ... وإن جوزها مالوش عليها أي حقوق او قوامة ... وبتتعامل مع جوزها بمنتهى الحدة و الندية
النماذج اللي فوق دي نتيجة بيوت اصلا متأزمة وماعرفتش تأهل ولادها للجواز .. ونتيجة إعلام مضلل رسم في عقول الشباب والبنات صورة مشوهة عن الحياة الزوجية ...وللأسف لسه قدامنا سنين هانقضيها في التيه ده ... ولحد ما نخرج من التيه ده هاندفع التمن بمزيد من حالات الطلاق وبمزيد من البيوت الغير سعيدة و المفككة... وبمزيد من الأطفال الغير أسوياء.... ولا حول ولا قوة الا بالله