من المشاعر اللطيفة في الحياة الزوجية .... انك تبتدي تشوف المعاني الجميلة المدفونة جوه الحاجات اللي قد تبدو انها عيوب.
- يعني تشوف لسعة نار البوتاجاز اللي في إيد مراتك مش مجرد تشوه في الجلد....لكن تشوفه دليل تعبها وهي بتحضرلك الاكل.
- وبطنها اللي حصل فيها شوية ترهلات .... ده حصل بعد الحمل و الولادة القيصري اللي جابت بيهم عيالك.
- وعينيها الدبلانة ...ده بعد سهر ليلتين مع أبنك الرضيع اللي حالف ما ينام بقاله يومين.
- قميص جوزك اللي مليان عرق ... ده بعد الجري على أكل العيش طول اليوم عشان يقدر يحقق طلباتكم.
- والعصبية اللي بتنزل عليه أحيانا ده بسبب ضغط الشغل و المسئولية اللي حاسس بيها .
ده مش معناه اننا نهمل في نفسنا وفي نضافتنا وفي لبسنا...ومش معناه اننا نسيب أخلاقنا وطباعنا فريسة لضغوط الحياة ....احنا مطالبين بمحاولة التجمل طول الوقت.
لكن دي محاولة لرؤية شريك حياتك بشكل مختلف .... رؤية متناسقة مع طبيعة الحياة الدنيا اللي مش ممكن تخلو من العيوب و النقصان .
أما كمال الحال.... ففي جنة الخلد إن شاء الله