عارفين ايه الميزة الكبيرة اللي موجودة عند الانسان ومش موجودة عند الملائكة؟ … والملائكة مندهشة منها لانها فوق تصورها؟
الميزة هي إرادة الانسان الحرة في عبادة الله والإذعان له ولأوامره …طواعية ودون إجبار
انت متميز بانك ممكن تعمل الصح رغم صعوبته …وبكامل إرادتك
انت أمين رغم انك ممكن تسرق… متمسك بالعفاف رغم ان الزنا سهل… بتلبسي الحجاب رغم انك ممكن تخرجي بشعر وجسم مكشوف.
حاول دايما تعمل الصح… حتي لو بتغلط احيانا
إختيارك الحر للحلال الطيب هو احد اكبر مميزاتك … فماتخليش الشيطان ينزع منك اجمل وأميز ما فينا ... رسوخ المعني ده جوانا هايفرق معانا جدا في حياتنا الايمانية والأسرية والعملية
من الحاجات اللي بنحاول نعلمها للولاد في البيت (وربنا يقدرنا) ... هي فكرة إن الإنجاز والسعادة لازم يكون قصادهم تعب و صبر وتضحية
مش هانقدر نتعلم اي علم جديد... غير لما نذاكر ... والمذاكرة محتاجة وقت ومجهود
مش هانقدر نحفظ قرآن... غير لما نخصص وقت للحفظ ونفضل نكرر الآيات
عشان ناكل في وقت مناسب .... لازم نساعد ماما في ترتيب السفرة
عشان نقعد في مكان نضيف ... لازم نرتبه وننضفه
عشان نشتري اللعبة الفلانية ... لازم نحوش فترة قبلها
عشان ناخد حسنات ... لازم نتنازل عن جزء من الفلوس اللي معانا ونتصدق بيها
عاوزين إني أحكي لهم حدوتة قبل النوم ... لازم نلتزم بميعاد النوم من غير تأخير
هي الحياة كده ... مش هاتنفع تكون كلها لعب وانبساط وإستمتاع ...وطبيعي إن ماحدش بياخد كل حاجة.... و اي حاجة عاوزين نعملها بتحتاج تحمل مسؤولية وجهد وصبر
طبعا الكلام ده بيتعمل بشكل مرن و مش بحد السيف... بس لازم نحاول نعمل كده عشان الولاد يطلعوا قادرين يتحملوا المسئولية ويقدروا يطوروا من نفسهم... ويكون عندهم تصور حقيقي عن الحياة بدون خداع