أقولكم على حاجة ..... بس من غير زعل ...في مشكلة في الجيل بتاعنا في موضوع الجواز ....إن الجيل بتاعنا عنده شوية هشاشة كده .... احنا جيل طري شوية .... في كتير مننا مش بيستحملوا مسئولية الجواز .. و الطلاق بقى بيتطرح على خناقات صغيرة ... والبيوت بتتهز جامد مع اصغر عاصفة... الهروب بقى من أقرب بوابات الخروج من المشاكل ... وفي بيوت بتنهار مع اول شوية ضغط.... بقينا نتأثر بالمشاكل اللي بتحصل تأثر متضخم جدا.. ونفسنا قصير جدا في مواجهة المشاكل وحلها.
ده طبعا ليه أسباب كتير :
زي طبيعة النشأة اللي اتربينا فيها ...وزي التصورات الوردية والمغلوطة اللي عند كتير من الشباب والبنات عن الجواز.
وزي تأثير الميديا على حياتنا .... وزي شيوع الطلاق اللي خلى الناس تتعود على فكرة الانفصال والتأقلم عليها
أحيانا ببقى نفسي أقول للزوجين اللي بيجولي في جلسات الاستشارات (ما تنشفوا شوية كده ... وده مش عدم أحساس مني بمعاناتهم.... بالعكس ... اللي زي حالاتي بيبقوا عارفين أوجاع الناس كويس وقت المشاكل .... بس الحقيقة مش صح إن كل ما تحصل مشكلة... الوضع يتأزم جامد ونلاقي إن الطلاق بيحوم حوالين البيت.
عشان كده التأهيل للجواز بقى شئ ضروري .... ضروري عشان حاجات كتير من أهمها رفع اللياقة النفسية للاجيال الجاية عشان يعرفوا إزاي يتحملوا مسئولية الجواز وإزاي يتعاملوا مع تحدياته
طبعا في حالات بيكون فيها المشاكل فعلا صعبة .. وحالات بيكون الطلاق فعلا أقل الخساير ... وبيكون الناس فعلا إتحملت كتير قبل الطلاق .... بس طبعا الحالات دي أقل بكتير من معدلات الطلاق اللي بيشهدها المجتمع دلوقتي