منتديات مسك الغلا | al2la.com - عرض مشاركة واحدة

**الفيلسوف** · 10-18-21, 09:48 AM

بيت من غير روتين يومي وبعض القواعد... هو بيت يمثل بيئة فاسدة للأبناء .
لازم ولادنا يتربوا ويتعودوا على بعض الحاجات زي:
- مواعيد ثابتة للصحيان والنوم ... مع تثبيت بعض الطقوس وقت الصحيان والنوم زي غسيل الأسنان ودخول الحمام ولم اللعب وتحضير شنطة المدرسة قبل النوم ... وهكذا
- وقت محدد للعب على الموبايل او التابلت.
- الابتعاد عن بعض الأطعمة المضرة وتناولها على فترات متباعدة.
- التأكيد على الآداب العامة زي آداب الطعام وآداب الاستئذان وآداب زيارة الاهل وآداب إستقبال الضيوف .. وهكذا
- المشاركة في بعض المسئوليات وبشكل ثابت ومناسب لسن كل طفل ...زي تحضير السفرة وترويق المكان وشرا بعض الطلبات من السوبر ماركت وترويق السراير ... والمساعدة في تنضيف البيت قبل الأعياد..وهكذا
وجود روتين يومي في البيت ... بينظم وقت الاولاد وبيقلل من المناهدة والمعافرة.... وعلى الرغم انهم ممكن يتذمروا احيانا من وجود قواعد وبيبقوا عاوزين يكسروها لكن في نهاية الأمر نفسيتهم بتبقى أفضل.
الحفاظ على بعض الروتين في البيت لازم يحصل بخليط من الود والحب والحزم والتحفيز ...ولازم يكون مرن طبقا لكل مرحلة سنية وكل مرحلة بيمر بيها البيت.
إحنا لو ماعملناش كده ... هنربي جيل عنده تصور غير سليم عن الحياة وطبيعتها ... وبنربي جيل غير قادر على الالتزام وغير متحمل للمسئولية.

تحابيش ع السريع

(أضمن منين اني بعد ما افركش الاقي حد تاني أحسن)
(انا ماعنديش طاقة أدخل في علاقة جديدة)
(اللي أعرفه أحسن من اللي ماعرفوش)
دول من أسوأ 3 أفكار ممكن يسيطروا على حد دخل في تجربة خطوبة وإتأكد إن الطرف التاني مش مناسب تماما ... ومع ذلك يكمل خوفا من المجهول او إستخسار للطاقة النفسية او المجهود اللي إتبذلوا
وده ممكن يخلي ناس كتير تلبس في الحيط ... وبيكتشفوا ده بعد الجواز للاسف