من اكتر الحاجات الخطيرة اللي ممكن تحصل في أول الجواز .... إن مستوى المشاكل في اول فترة يبقى أكبر من الرصيد و الذكريات الحلوة اللي لسه الزوجين مالحقوش يصنعوها بسبب كتر المشاكل اللي بتحصل في مدة صغيرة (وده ممكن يحصل حتى لو كان في عاطفة في فترة ما قبل الزواج)
وده بيخلى المعالجة بتبقى صعبة وبتاخد وقت ... والجروح بتبقى أعمق ... وسوء الظن والاحباط والصدمة بيسيطروا على المشهد .... والدنيا بتكلعكع وبتتشابك بسرعة.
وده أحد أهم الأسباب اللي بيخلي 50% من حالات الطلاق بتحصل في اول 3 سنين.
وعشان كده التأهيل لأول فترة في الجواز مهم جدا
فيا ريت ناخد بالنا من أول فترة بنتلمس فيها حياتنا الجديدة... ونحاول نعالج المشاكل اللي بتظهر اول بأول (حتى لو الأمر إحتاج زيارة حد متخصص) لانها فترة تأسيسية مهمة وبتسمّع في بقية حياتنا مع بعض.
المبادرة في إسعاد الناس اللي عايشين معانا... من الحاجات اللي طعمها حلو ... طعمها حلو جوانا و جواهم
المهام الروتينية اللي بنعملها عشان اللي حوالينا كل يوم حاجات مهمة طبعا ... لكن مهم كل فترة نسأل نفسنا سؤال (إزاي أسعد اللي حواليا النهاردة؟ ) ونعمل لهم حاجة إستثنائية
حلو إنك كل كام فترة تبعت رسالة لطيفة لمراتك فيها كلام حلو ... إتصل ببنتك كل فترة وقولها إنها جت في بالك دلوقتي فحبيت تقول إنك بتحبها ... خد إبنك في حضنك بدون سبب.
هات لمراتك هدية كل فترة حتى لو شيكولاتة من السوبر ماركت .
مش لازم ريقها ينشف عشان تجيب لها حاجة هي عاوزاها ... إعمل لها مفاجأة وإشتريلها حاجة نفسها فيها من غير ما هي ما تقول
إشتري لجوزك حاجة كان حارم نفسه منها عشان خاطركم ... هاتي له هدية رمزية.... إكتبي كلمتين حلوين في ورقة وحطيها في شنطته او في جيبه ... في مرة واحد زميلي مراته بعتت له بوكيه ورد على الشغل في يوم ذكرى جوازهم وكانت حركة لطيفة .... إطبخي أكلة بيحبها جوزك وقدميها بشكل حلو ... جمعي الاولاد وادعي لكل واحد فيهم بالاسم وخليهم يسمعوا دعاءك ليهم عشان يعرفوا قد إيه انت بتحبيهم
المبادرة بحاجات إسثنائية كل فترة ... بتخلينا نحس إن اللي حوالينا بيفكروا فينا وبيحبونا ومهتمين يسعدونا