(يا ريتني كنت واحد صاحبك عشان تقعد معايا) .. ( أنت كل اللي يهمك إنك تريح دماغك) ... (إنت راجل غير مسئول) ... ( سيبك مني ... أنا مش مهمة ... طب شوف ولادك وطلباتهم) .... (إنت مابتعرفش تتكلم ولا تتصرف ولا اي حاجة) ... الخ
أحيانا الزوجة بيكون عندها إحتياجات نفسية مهمة ... عاوزة جوزها يتكلم معاها .... او يقعد معاها ... او يتفسحوا .... او يراعي مشاعرها في علاقته مع أهله ... او عاوزه دعم منه في حاجة تخص الولاد.... وده حقها
بس لما بتطلب الكلام ده .... تطلبه بشكل سلبي جدا ... بشكل مليان إنتقاد مباشر وتقطيم وهجوم ومقارنات وسوء ظن .... بكلام مليان بعدم الرضا عنه وعن تصرفاته وإنه خذلها وكده ... ومتخيلة إن جوزها لما يشوفها بالحالة دي هاتصعب عليه
لكن الحقيقة إن الطريقة دي نتيجتها عكسية جدا .... وحتى لو عمل لها حاجة بيبقى من باب إنه يخلص من زنها مش أكتر
الراجل لو إستقر جواه إنه خلاص مابقاش قادر يرضي مراته ... بيزهد أكتر في محاولة إرضائها (على عكس ما هي متوقعة)
عشان كده الأفضل إنك تتكلمي معاه عن إحتياجاتك وطلباتك بشكل إيجابي ومن غير هجوم ولا شخصنة ولا مبالغة ... وده اللي بنحاول نتعلمه بالتفصيل في الدورات وجلسات الاستشارات كجزء من حل سوء التواصل في البيوت .
** ملحوظة : في زوجات بيقولوا إنهم إستخدموا كل الطرق اللطيفة ومفيش فايدة
- وارد جدا يكون في مشكلة عند الزوج وهو اللي محتاج لتوجيه .. ومحتاج يتعلم إزاي يفهم مراته وإزاي يلبي إحتياجاتها
- ووارد جدا تكون الزوجة فعلا شخصية حادة وعنيده وهجومية ... وفاكرة نفسها هادية وطيبة ..وماتعرفش إنها بتحدف طوب
لما تحصل مشكلة كبيرة بينك وبين مراتك... وانت كنت اللي غلطان ... وهي زعلت منك.... وانت عاوز تصالحها
مهم وقتها إنك تسمعها كويس ... إديها فرصة تعاتبك ... حسسها إنك حاسس بمشاعرها السلبية.
أنا عارف إننا كرجالة بنحب نتجاوز المشاكل من غير كلام كتير .. وبنعتبر إن الكلام الكتير عن اللي حصل في المشكلة ده شكل من أشكال النكد
بس الستات مش كده .... الست مش بتهدى الا لما تحس ان جوزها حس باللي جواها وإنه عنده رغبة حقيقية إنه هايحاول مايكررش اللي حصل
فلو إنت حاولت تعتذر بكلمتين في السريع كده .. من غير ما تديها فرصة تتكلم وتعاتب ... هي ممكن تحس إن إعتذارك فض مجالس وترييح دماغ مش اكتر .. رغم إنك ما تقصدش كده
وده ممكن يخلي الجرح مفتوح وانت فاكر إن الموقف عدى وخلاص ... وعشان كده ممكن تلاقيها بتجيب سيرة المشكلة بعد فترة لأنها لسة عندها رغبة تتكلم وتعاتب وتطلع اللي جواها.
عشان كده أحسن طريقة تزيل بيها آثار المشكلة ... انك تسمعها كويس .... وتتحسسها إنك حاسس بيها .... وتطمنها ... وتطيب بخاطرها