سألني وهو مستغرب .... هو ليه في شخص بيبقي متجوز وبحس انه عاوز يعيش في نكد علي الرغم إن مفيش حاجة تستدعي كده..... هو ده ممكن يحصل؟
= آه... ممكن يحصل أحيانا
فعلا ؟!! ... في حد بيحب ينكد علي نفسه؟
= مش الفكرة انه عاوز ينكد علي نفسه.... الفكرة إنه عنده نقطة مش سوية جواه.... والنقطة دي أكبر من رغبته في السعادة الجماعية ... والنقطة دي نشأت بسبب قناعات وأفكار غلط او سلوك وطبع معووج لظروف نشأة مش سوية.. او نتيجة هوى نفس فاسد....و دايما بتكون النقطة دي من نقط التوتر اللي بينه وبين شريك حياته... وبيحصل بسببها مشاكل كتير.
مش فاهم
= هاديك أمثلة
الراجل البخيل مثلا ... سعادته في التحويش أكبر من رغبته في السعادة الجماعية اللي هاتحصل من خلال النفقة علي زوجته وأولاده.
الست العنيدة المتكبرة ... رغبتها في تنفيذ كلامها (حتي لو غلط) أكبر من رغبتها في السعادة الجماعية
وساعتها هايكون النكد نتيجة طبيعية حققناها بإختيارنا.
آآآه.... بدأت أفهم....وطب و الحل؟
= الحل ساعتها ان الطرف اللي عنده مشكلة يقف مع نفسه ويفهم انه بالشكل ده مع الوقت بيدمر بيته وبيحرم نفسه واللي حواليه من سعادة كان ممكن يعيشوها سوا.. وكل ده بسبب حاجة جواه لازم يعالجها بنفسه او بمساعدة حد متخصص.