احيانا بنبقى عاوزين نهون على حد موقف صعب.... فنفضل نحاول نحسسه إن الموضوع بسيط ومفيش داعى للقلق
أحيانا ده بيكون أسلوب مش صح ... رغم إنك عاوز تهون عليه... لأن وقتها الشخص اللي بيعاني ممكن يفهم من كلامك انك مش حاسس بمعاناته ... وبيفهم إنك بتتهمه بالمبالغة والحساسية الزايدة والقلق الغير المبرر.
وبدل ما يمشي معاك في سكة الحل وتبسيط الأزمة ... بيفضل يتكلم اكتر واكتر عن المعاناة اللي هو حاسس بيها عشان تحس بيه
(انا حاسة بيك) ... ( اللي حصل ده يضايق فعلا) ... ( الموقف اللي انت إتحطيتي فيه موقف صعب) ... (حاجة تزعل فعلا) ... ( الله يكون في عونك ) ....الخ
العبارات دي ممكن تحسس صاحب المشكلة إننا حاسين بيه ... و بنساعده في الخروج من دايرة الشعور بالمعاناة لدايرة محاولة تجاوز المشكلة وحلها (إن كان ليها حل)
التصديق على المشاعر اول درجات الاحتواء وتجاوز الازمات
أحيانا الراجل ممكن يتكلم مع ست تانية غير مراته في إطار غير شرعي ... وده عشان مراته بتهمله وفي بينهم مشاكل (وده طبعا مش مبرر) لكن دي الدوافع اللي جواه .... وطبعا لما مراته بتعرف بيحصل مشاكل ... وقتها أحيانا الزوجة بتحاول تصلح علاقتها معاه وتاخد بالها منه .
والراجل ده بيكون حابب يكمل في السكة الغلط اللي هو فيها ومش عاوز يبعد عنها ... وعاوز يحافظ على مبرراته عشان ضميره مايأنبوش ... فبيبقى حريص انه يخلي مراته دايما في مربع الست النكدية المهملة ... فبدل ما يساعدها ان علاقتهم تتحسن وأنهم يحلوا مشاكلهم ... بيفضل ينصب لها كماين ويخليها تقع فيها عشان تغلط اكتر واكتر... عشان يفضل عنده المبررات اللي تخليه يستمر في السكة الغلط .... وللأسف الطريقة دي فيها خبث شديد في التعامل مع المشكلة والهدف منها هو التبرير لاستمرار في الغلط
(وطبعا العكس بيحصل أحيانا من بعض الزوجات للاسف)
في الغالب السبب الأكبر في سهولة الوقوع في بئر العلاقات الغير شرعية بيكون خلل في الحالة الايمانية والاخلاقية (طبعا مش السبب الوحيد)
لو إنت إتأكدت ان السبب الرئيسى في ضعفك قصاد الحرام هو عدم إشباع شريك حياتك لاحتياجاتك.
اولا : حاول تحل المشاكل اللي بينكم بشكل جاد وبصدق وبطريقة سليمة ... ومن غير نستسهل اللجوء للحرام والغلط
ثانيا : لو فشلتم في حل مشاكلكم.. وفعلا مفيش فايدة (ومعظم المشاكل بتتحل على فكرة ) وبقى البديل إننا نلجأ للحرام... وقتها نقدر نقول (فتسريح بإحسان) ... وكل واحد فينا يشوف الحلال في حتة تانية.
ولو راجل هو اللي بيعاني من المشكلة .. ممكن يدرس موضوع الجواز التاني (وده قرار مش سهل ومحتاج دراسة)
الخلاصة .. عمر ما كان الإهمال والمشاكل مبرر للجوء للحرام ...حلوا مشاكلكم ...ولو مش قادرين ففي الحلال متسع