هو بيتصل بيها ... هي ماكنتش سامعة الموبايل ...اتصل بيها كتير ... هو قلق عليها ... اول ما هي ردت عليه قعد يزعقلها عشان هو كان قلقان عليها لما هي إتأخرت في الرد
المفروض ان قلقه عليها شعور إيجابي ... لكن طريقته خلتها تقفل منه بدل ما تحس بمشاعره الايجابية دي
هي مفتقداه و عاوزاه يقعد معاها ومع الولاد شوية .. وهو عاوز ينزل يقعد مع صحابه .... هي إتخانقت معاه عشان هاينزل .. هو سابها ونزل وهو متضايق منها.. او قعد معاها وهو مقفول منها
المفروض شعور إنه واحشها شعور إيجابي... لكن طريقتها خلته يقفل منها
بلاش نحرق مشاعرنا الايجابية بسبب إننا بنستخدم أسلوب سلبي ... لأن وقتها اللي قصادنا هايفهم إننا بنرخم عليه او بنتحكم فيه أو بننكد عليه .. بدل ما يحس إننا بنحبه وبنقلق عليه وبنفتقده
النية الكويسة لوحدها مش كفاية ... الاسلوب مهم زيه زي المشاعر
لما تلاقي شريك حياتك دايما بيكرر شكوي معينة أثناء خناقاتك معاه ... والشكوي دي ممكن يكون ملهاش علاقة بموضوع الخناقة أساسا .. إعرف إنه موجوع قوي من الحاجة دي. والخناقة كانت فرصة للتعبير عن مشاعره.
يعني لما تلاقي مراتك كل ما تتخانق معاها تقولك ( أصلك طول اليوم في الشغل وسايبني لوحدي) ... إعرف إنها موجوعة من إنشغالك عنها..
أو لما تلاقي جوزك كل ما يزعق معاكي يقولك ( ما إنتي يا هانم من يوم ما خلفتي وانتي مش شايفة غير عيالك) .. إعرفي إنه موجوع من إهمالك ليه.
مش كل اللي بيتقال في الخناقات كلام ساعة غضب... أحيانا بيكون الكلام رسايل لازم تفهمها.