في ناس بتنتقد فكرة إن الواحد يمدح زوجته أو يعلن عن حبه ليها علي الملأ كده علي الفيس .. وتبدأ ناس تقول ( ما هي قاعدة عنده في البيت مايقولها الكلام ده بينهم وبين بعض) او ( ما يبعتلها الكلام ده في رسالة علي الانبوكس ...الحاجات دي حاجات خاصة مش لازم علي الملأ كده يعني) او ( داري علي شمعتك تقيد)..الخ
الزوجة بتحب جدا ان زوجها يعلن عن حبه ليها ويهتم بيها ويحترمها قصاد الناس..لانها بتحس انها مميزة قصاد بنات جنسها من النساء.. وده شعور فطري .
**النبي صلي الله عليه وسلم لم يخجل من التعبير عن حبه لزوجاته علي الملأ مخالفا للعرف السائد وقتها اللي كان موروث من العهد الجاهلي.
يعني تخيل لما سيدنا عمرو بن العاص بعد ما عمل مجهود رائع في غزوة ذات السلاسل ... وحب يعرف مكانته عند النبي فسأله ( من أحب الناس اليك؟) والنبي عارف انه بيسأله علي الشخص اللي من الصحابة الرجال ..ورغم كده النبي أستغل الموقف عشان يبعت رسالة ود لزوجته ... فرد النبي وقال ( عائشة).. فسيدنا عمرو قال ( إنما أقول من الرجال) .. فقال النبي (أبوها) ..مع انه كان ممكن يقول ( ابو بكر) ...ولكنه قال (أبوها) عشان يبعت رسالة حب تانية للسيدة عائشة. تخيل فرحة السيدة عائشة لما سمعت الكلام ده وإزاي حبها للنبي زاد لما اعلن حبه ليها قصاد الناس والكلام ده هيتقال لحد يوم القيامة.
**إمدح في زوجتك وتصرفاتها وفي مجهودها معاك وخصوصا قصاد أهلك وأهلها وشوف هي هتبقي سعيدة ازاي.
** لكن ده مش معناه انك لما تحب تعلن حبك لزوجتك قصاد الناس... انك تشير صور ليكم في لحظات رومانسية وتكتب تحت الصورة كلام مبتذل.. عبر عن مشاعرك بشكل عفيف ومن غير ما تكون حياتكم الخاصة مشاع لكل واحد معدي في الشارع.
** الكلام ده بيبعت رسالة ايجابية عن الجواز للمجتمع.. بدل ما الناس بدأت تقتنع ان الجواز ده مجرد نكد وهم ومسئولية وان العاطفة مجرد وهم ..وان مفيش حب في الجواز.
** لو انت في الحقيقة بتعامل زوجتك معاملة سيئة ... يبقي مفيش داعي تمثل قصاد الناس.