طالما يحلم احدنا بالزوجة التي تشاركه طاعة الله ليبني معها بيتا من بيوت الله في الارض ... ويتخيل بعض اللقطات التي كلما سرح فيها بخياله ينتفض قلبه فرحا ...فيتخيل مثلا بأنه يقرأ معها القرآن ...ويصلي معها القيام..و يتلو معها الاذكار ...ويفطر معها بعد صيام ...او يتشاركا عمل دعوي ..أو....أو.....
ثم يختار ذات الدين من بين كل بنات حوا لكي يحقق معها حلمه ...وبالفعل ..يبدأ الزوجان حياتهما بمنتهي الحماس .. يكاد لا يفارق احدهما الآخر ..فيصليان معا ويتلوا القرآن والاذكار معا ويجاهدان في سبيل الله معا.. ليتحول الحلم الي حقيقة وتتحول متعة الخيال الي متعة قلبية ملموسة محسوسة..
ولكن لا يستمر الوضع هكذا كثيرا.... لتكشر الحياة الدنيا عن أنيابها...فينشغل الزوجان بلقمة العيش والمصاريف واحتياجات الأولاد و......و......
وبعد فترة يكتشفا تلاشي كل العبادات المشتركة بين تفاصيل الحياة الكئبية ليصبح البيت ملتقي للمسئوليات ..ملتقي لكل ما هو مادي دنيوي .. ويقل ذكر الآخرة ويرفع الشيطان رآيات التمكين..
ثم يشتكي كل منهما كثرة المشاكل وقسوة الواقع وضياع البركة .
وقد تسمع أنين الجدران شوقا للربانية المفقودة وسخطا علي الدنيا المسيطرة علي البيت.... وتتسائل اركان البيت أين القرآن؟...أين الاذكار؟...أين ؟..اين؟.
قد يحتاج بعضنا لأن يسترجع روح العبادة الفردية والجماعية في بيته ويستعيد الصورة التي كان يحلم بها قبل زواجه.
كلنا فينا عيوب.. ومحدش هيقدر يرتبط بحد خالي من العيوب ..لكن مينفعش تدخل في مشروع خطوبة بحد انت متأكد ان فيه عيب من( وجهة نظرك) انت مش بتقدر تتعايش معاه خالص.. حتي لو الطرف التاني وعد بإصلاح الصفة اللي انت مش بتحبها..
مينفعش تبقي انت ملتزم مثلا وتخطب واحدة مابتصليش اصلا وتقول ( انا هقدر اخليها تتغير) ..
مينفعش تبقي انتي عارفة انه عصبي جدا وانتي بتكرهي الصفة دي جدا وتقولي (بكره الزمن يغيره)
في حد مايقدرش يعيش مع حد كلامه قليل جدا.. وفي واحدة ماتقدرش تعيش مع حد مش عاطفي أو رومانسي..
طبعا مش محتاج اقول ان كل مرة يحصل فيها ظهور العيب أو الصفة دي . ده معناه خناقة جديدة... وبيظهر مع الخناقة شعور خفي او معلن بالندم علي الارتباط ده وبالتالي إعجابك بالطرف التاني بيقل مع الوقت.
بيبقي شعور مؤلم لما طرف يحس ان الطرف التاني مش راضي عنه بشكل كامل ..وبيحس ان المفروض انه يتقبله بكل مميزاته وعيوبه..
مفيش حاجة اسمها تغيير لحظي ..الطبائع البشرية عشان تتغير بتحتاج وقت كبير من التربية ومجهود مش قليل .. وان انت تبقي مراقب عملية التغيير دي بيخليك تحس ان الارتباط ده عبء علي كتافك.
غالبا الطرف اللي وعدك بتغيير صفة انت مش قادر تتعايش معاها بيعدي عليه وقت من كتر المشاكل يقولك( انا كده.. ومش هتغير)
طبعا لكل قاعدة شواذ...وكل حالة وليها ظروفها..لكن بشكل عام ما أنصحكش في موضوع زي الجواز انك تغامر.
من الآخر.... كده كده شريك حياتك هيكون فيه عيوب.. لأنه بشر.. لكن لو فيه صفة انت بتصنفها انها عيب قاتل... فكر ألف مرة