من الحاجات اللي ممكن تحصل في بيوتنا ... ان الزوجين بعد الجواز بيعملوا حاجات غريبة تحت فكرة (( انا بحب أقعد في بيتي براحتي)).. وتحت الفكرة دي تبدأ تتلاشي كل الذوقيات لحد ما تختفي تماما..
يعني الزوج اللي كان ايام الخطوبة برنس في نفسه كده .. ممكن تلاقيه بعد الجواز اول ما يصحي من النوم لا بيغسل وشه ولا أسنانه ويفضل قاعد قصاد زوجته واولاده بطلعته البهية دي ..
وتلاقي هدومه اللي بيقعد بيها في البيت أصبحت من غير ملامح من كتر الفتحات اللي فيها..
وتلاقي في بعض التصرفات الغير مبررة بقي بيعملها في وجود زوجته مع أن المكان المناسب للحاجات دي هو الحمّام grin emoticon .
وتحس ان البرفيوم بتاعه أصلا مكتوب عليه (لا يتم استخدامه الا في حالات الطوارئ).
وتلاقي زوجته بقت منبهرة بحالة التحول اللي حصلت لاسلوبه في الكلام ..ده لأنه بقي بيجعّر في البيت طول النهار ... والألفاظ الخارجة بقت اللغة الأم للسانه.
ولما تقوله ايه اللي بتعمله ده يا عم ؟ يقولك (( انا بحب أقعد في بيتي براحتي))
والزوجة اللي كانت ايام الخطوبة بتحلم انها تتجوز علشان توّري جوزها كل صيجات الموضة .. بقت جلابية المواعين هي الزي الرسمي للبيت .
وتلاقيها بقت مقتنعة ببعض النظريات العلمية ... زي ان المايك أب ضار بالبشرة .... وان لبس البنطلونات والبديهات والحركات في البيت ضار جدا بالصحة ويسبب الوفاة smile emoticon .
ولما حد يسألها ليه كده يا بنت الناس ؟ ...تقول (( انا بحب أقعد في بيتي براحتي))
نتكلم جد بقي
مش معني ان الزوجين خلاص بقوا كيان واحد ...وحصل بينهم اندماج روحي وجسدي .انه يكون ده مبرر للرفع الكلفة بينهم بشكل كامل .. وان كل طرف يهمل نفسه .. وانهم ميراعوش الذوق في تعاملهم مع بعض..
عشان كده في حاجات لازم نحافظ عليها
1- الحفاظ علي سنن الفطرة بيضمن الحد الأدني من الجمال - منها (السواك ، واستنشاقُ الماء ، وقصّ الأظفار ، وغسل البراجِم ، ونتفُ الإبط ، وحلقُ العانة ، وانتقاص الماء)
سئلت السيدة عائشة بأي شيء يبدأ رسول الله صلى الله عليه وسلم إذا دخل بيته ، قالت : " كان إذا دخل بيته بدأ بالسواك )... تخيل !!!
2- محدش قال ان الزوج يقعد في البيت بقميص وبنطلون .. او ان الزوجة تقعد بفستان سواريه...أهم حاجة ان الزوجين يقعدوا في البيت بهدوم نضيفة .. وفي هدوم كتير بتبقي مريحة وفي نفس الوقت شيك غير الفانلة الحمالات والجلابيات ..
يبقي كويس لو الزوجين ينزلوا يختاروا سوا الهدوم اللي كل واحد فيهم نفسه يشوف التاني لابسها في البيت
3- لو احنا اتعلمنا اداب الطعام والشراب و دخول الخلاء (الحمّام) .. ده هيفرق معانا جدا .
4- مش معني ان الناس خلاص اتجوزت وادبست في بعض انها تكلم بعض باسلوب وحش .. في مصطلحات لازم تبقي موجوده في كلامنا .. زي ( شكرا - لو سمحت - من فضلك- جزاكم الله خيرا).
أخيرا .. لو في طرف مش عاجبه بعض السلوكيات اللي بيعملها الطرف التاتي.. لازم يشوف الطريقة المناسبة اللي يخليه يعدّل من سلوكه.