10-20-21, 09:09 AM
|
#1 |
| | 
سنه اولى
من السنن الكونية ان اي بيت لازم يحصل في مشاكل وخناقات وأزمات ...حتي بيت النبوة مرّ بأزمات وخناقات .. لدرجة إن النبي صلي الله عليه كان علي وشك انه يطلّق .والحقيقة المشكلة مش في وجود المشكلة.. ولكن المشكلة في إدارة المشكلة لما تحصل....ازاي تتعامل معاهاوتحلها .. وازاي تخرج منها بأقل الخساير ..وازاي تخليها متتكررش.. وازاي متخيش ليها أي أثر بعد حلها.
الحقيقة إن التعامل مع المشاكل اللي بتحصل في أول سنة حاجة في منتهي الخطورة ...وعشان تعرف خطورتها ..لك ان تتخيل إن اكتر من 50 % من حالات الطلاق بتحصل في السنة الاولي!!!
وعشان كده لازم الزوجين قبل الزواج يتفقوا علي شوية معاني و قواعد يمشوا عليها لما تحصل أي مشكلة.
• الحقوق والواجبات :
علي الرغم ان الاحسان والمعروف هي الاخلاق المفروض تبقي السائدة ما بين الزوجين ..إلا انه لازم كل طرف يعرف حقوقه وواجباته ويشكل شرعي.. .. لأن الحقوق والواجبات هي آخر خط دفاع لحل المشاكل في حالة إنهيار جدران الإحسان والمعروف ..وكتير من المشاكل بتحصل نتيجة عدم وجود خط فاصل ما بين الواجبات والحقوق..
زي مثلا الزوج اللي بيتخانق مع زوجته اللي بتشتغل عشان ما بتحطش مرتبها كله في مصاريف البيت.. وهو لو كان عارف بشكل شرعي انه مش من (حقّه) انه يطالب بكده وانها من (حقّها) انها تحتفظ بمرتبها كله .. وإن الانفاق ده (مسئوليته) هو .وان مساعدتها ليه شكل من اشكال الاحسان .كانت نظرته للموضوع هتبقي مختلفه.
• الخريطة المزاجية:
مهم ان كل طرف يعرف الخريطة المزاجية للطرف التاني .. ويعرف أمتي يكلمه ..وأمتي مايكلموش ..لان ممكن يكون المشكلة سببها بس ان حد منهم مش جاهز لاي نقاش أساسا.. زي مثلا وقت رجوع الزوج من الشغل ..أو وقت الاستيقاظ من النوم... أو أيام ما قبل وأثناء الدورة الشهرية للزوجة .. أو فترة الحمل للزوجة ... وهكذا
• خطوط حمرا:
لازم الزوجين يتفقوا علي خطوط حمرا ممنوع الزوجين يتخطوها أثناء المشكلة .. زي مثلا ان الزوج يضرب زوجته ... او الشتيمة والاهانة... او المعايرة بأخطاء الماضي.. لاننا لما بنعدي الخطوط الحمرا بتتكسر حاجات جوانا مابتتصلحش حتي بعد حل المشكلة
(عن عائشة رضي الله تعالى عنها ، قالت: ما ضرب رسول الله - صلى الله عليه وسلم - أحدا من نسائه قط ، ولا ضرب خادما قط ، ولا ضرب شيئا بيمينه قط إلا أن يجاهد في سبيل الله)
ولو احد الزوجين حسّ ان الشيطان سيطر عليه وانه علي وشك ان يتخطي الخطوط الحمرا .. يبقي لازم ينسحب ويطلب تأجيل المناقشة ..ويعمل الحاجات اللي وصانا بها النبي.. : قال رسول الله صلى الله عليه وسلم : ( إذا غضب أحدكم فليسكت ) وقال ( إذا غضب أحدكم وهو قائم فليجلس ، فإن ذهب عنه الغضب وإلا فليضطجع ) .
• إختيار الحكّام
طبعا من البديهي ان المشاكل المفروض ماتخرجكش بره البيت وانها من الاسرار الاسرية..ولكن احيانا المشكلة بتتفاقم لدرجة انه بيبقي من الصعب انها تتحل بشكل ذاتي..بيبقي مهم وقتها يكون الزوجين متفقين علي شخصيات محددة يرجعولهم .. والشخصيات دي معروفة برجاحة العقل وحسن الخلق ومحل رضا من الزوجين ...خلي بالك لو الزوجين مش متفقين من الأول علي الحكام ...وقت المشكلة أي حد معدّي في الشارع بيدّخل.. وانتوا عارفين احنا شعب بيحب يوّجب ��
•جلسة المصارحة:
لازم الزوجين يقعدوا مع بعض بشكل دوري (مرة كل اسبوع او أسبوعين) يصارحوا بعض بشكل رقيق عن الحاجات اللي مضايقاهم وده وده بيخلصهم من المشاكل أول بأول قبل ما تكبر
• الإعتذار والعفو
الاعتذار لغة المحبين..والتعود عليه محتاج تدريب ..والاعتذار مفعوله سحري في القضاء علي آثار المشاكل..وفي مشاكل بيكون حلها بس ان طرف يعتذر للتاني... وفي المقابل الطرف التاني يتقبل الاعتذار فورا.
• وصية أخيرة للزوجة
.قال النبي صلي الله عليه وسلم ( الَاْ أُخبِرُكُم بِنِسَائِكُم فِي الجَنَّةِ ؟؟ كُلُّ وَدُودٍ وَلُودٍ ، إِذَا غَضِبَت أَو أُسِيءَ إِلَيهَا أَو غَضِبَ زَوجُهَا ، قَالَت : هَذِه يَدِي فِي يَدِكَ ، لَاْ أَكْتَحِلُ بِغُمضٍ حتَّى تَرضَى )
• وصية أخيرة للزوج
قال تعالي : (وَعَاشِرُوهُنَّ بِالْمَعْرُوفِ فَإِنْ كَرِهْتُمُوهُنَّ فَعَسَى أَنْ تَكْرَهُوا شَيْئاً وَيَجْعَلَ اللَّهُ فِيهِ خَيْراً كَثِيراً) |
|
|
التعديل الأخير تم بواسطة الفيلسوف ; 10-20-21 الساعة 03:20 PM
|