بتحب مين أكتر ... أنا ولا ماما؟
بتحب مين أكتر ... أنا ولا بابا؟
السؤال ده كارثي في تربية الأولاد.
السؤال ده اللي بيحط أولادنا علي أول درجة في سلم التصنيف والتحزب.
السؤال ده اللي بيوّصل رسالة للطفل إن الأب والأم ممكن يكونوا جبهتين مش جبهة واحدة...وإنه مضطر يختار بأهواءه جبهة من الجبهتين عشان ينضم ليها.
وأحيانا كمان طرف من الطرفين يحاول إنه يقلل من قدر الطرف التاني ( ولو بهزار) قدام الأولاد عشان يكسب قلوبهم.
وبعد كده نستغرب إزاي البيت إتحول لجبهتين ..
ومحدش كان يتخيل إن البداية كانت من السؤال ده ( بتحب مين أكتر ؟)
وانت بتربي أولادك ... حاول تستفيد من أخطاء أبوك وأمك معاك علشان متكررهاش تاني مع أولادك.
بس صدقني... ملهاش لازمة دلوقتي إنك تحاسب أبوك وأمك علي أخطاءهم في تربيتك بعد ما كبرت خلاص .
ومتحاولش تعرفهم إنهم غلطوا معاك... هما لو كانوا يعرفوا يعملوا معاك أحسن من اللي عملوه مكانوش إتأخروا..
هما ربوك أحسن تربية من وجهة نظرهم ومن خلال ظروفهم ومن خلال اللي إتربوا عليه ومن خلال أفكارهم اللي ممكن كانت غلط وقتها... بس هو ده اللي حصل.
كل اللي ممكن تعمله دلوقتي إنك تطبطب عليهم وتريحهم وخليك عارف إنهم مفتاح جنتك.