أحيانا الزوج بيحتاج إن الزوجة تعامله زي ما بتعامل الضيوف بالظبط... أيوة زي ما بقولكم كده..
يعني محتاج لما يوصل البيت زوجته تقوله ( نورت البيت)
ومحتاج إنه لما يدخل البيت الزوجة تقدمله حاجة ( سخنة أو ساقعة حسب الجو) يشربها من غير ما يطلب.
وإنها تسأله ( تحب تشرب إيه؟) .وفي عينيها رغبة حقيقية للكرم.
وإنها تجهزله الحمام... وترمي الصابونة اللي بقالها أسبوعين ع الحوض ومش عاوزة تخلص لحد مابقت مصدر للإتساخ مش النضافة.
ويا سلام لو رشت معطر جو قبل ما يوصل..
وإن لو المووود بتاعها مش كويس ... تحاول تسيطر علي نفسها شوية عشان خاطر ( الضيف) .. أقصد الزوج.
صدقوني... لو الزوجة عملت كده... مش بعيد الزوج يدخل عليها ب ٢ كيلو موز لزوم الزيارة