(أنا آسف)
معظم الزوجات بيكون سهل عليهم لما
بيغلطوا إنهم يتأسفوا بشكل صريح وده شئ بيحتاجه الزوج .
وساعتها الزوجة بتبقي مستنيه من الزوج لما يغلط إنه يعتذر بشكل مباشر زي ما هي بتعمل.
لكن الحقيقة إن معظم الأزواج بيكون صعب عليهم كلمة ( أنا آسف).
وده مش معناه إنه متكبر أو بيستهين بزوجته ... لكن ممكن يكون ماترباش علي كده ( وده غلط طبعا).
الزوج اللي بالنوعية دي ممكن يكون بيعبر عن إعتذاره بشكل مش مباشر.
يعني في راجل لما يحب يعتذر لزوجته يقولها ( قومي إلبسي عشان نخرج)..أو ( خلاص متكشريش كده ويبقي دمك تقيل)
او يعزمها علي الغدا...او يجبلها هدية..او ممكن يجيبلها حاجة كانت هي طالباها وهو كان منفض.
وقتها الزوجة لازم يكون عندها القدرة علي ترجمة الكلام ده ... وتفهم إنه كده بيعتذرلها .
طبعا ده ما يمنعش إن الزوجة أحيانا بتبقي محتاجة تسمع إعتذار واضح ومباشر وخصوصا لما بتكون مجروحة جدا... وقتها لازم الزوج يتفهم الشعور ده ويريحها ويطمنها.