من اكبر المصايب اللي ممكن نعملها في حق ولادنا ... اننا نتعامل معاهم علي أساس انهم واجهة وممثلين ( representatives) لينا .... وان أي سلوك سلبي يصدر منهم قصاد الناس بنفترض ان صادر مننا احنا شخصيا و انه فضيحة وبيخلي شكلنا وحش .
وده بيخلينا واحنا بنعدل سلوكهم ....بيبقي عينينا علي منظرنا قصاد الناس .
وبالتالي رد الفعل ممكن يكون اكبر من الغلط ومبالغ فيه .... لانه في الحقيقة رد فعل ناتج عن محاولة الدفاع عن نفسنا وعن منظرنا اللي باظ .... فبيكون رد الفعل فيه في شكل من أشكال الانتقام من الطفل اللي كان السبب في الاحراج ده.... وبدل ما نعدل سلوكهم بنصب غضبنا عليهم.... وبنبقي عاوزين نتيجة فورية لأوامرنا عشان نخرج من الإحراج اللي إحنا فيه.
ايوة... احنا مسئولين عن تربية ولادنا وسلوكهم... ولكن هما في النهاية أطفال ... ممكن يقولوا كلام مش صح... ممكن يعندوا... ممكن يكسروا حاجة.... ممكن يحكوا حاجة المفروض ماتتحكيش.... ممكن يتحانقوا مع أقرانهم... ممكن يوسخوا هدومهم.
يعني لما ابنك يعمل حاجة غلط...المطلوب منك تتجاهل نظرة الناس ....وإسأل نفسك هل المفروض أسكت دلوقتي واتناقش معاه بعدين .... ولا لازم آخد رد فعل دلوقتي وإيه هو رد الفعل؟ .... ولا أتجاهل الموضوع خالص ؟
يعني لما إبنك ياخد لعبة بتاعت صاحبه من غير مايقوله... فهّمه ان ده غلط وخليه يرجعها له ويعتذرله حتي لو الموقف ده هيخلي شكله مش كويس قصاد صاحبه وأهله.
لما بنتك تعيط وتصرخ قصاد الناس عشان عاوزة تشتري حاجة كان في إتفاق بينكم إنها ممنوعة.... أوعي ترضخ لعياطها حتي لو ده هيخلي شكلكم وحش قصاد الناس... وحاول تحل الموضوع وأخلق بدايل من غير ما ترجع في إتفاقك معاها .
طب إفرض ان إبنك بيعمل حاجة بتأذي الناس فعلا.... يعني بيتشاقي جدا وبيتنطط وبيكسر في بيت قرايبكم وانتوا بتزروهم... او عامل دوشة في المسجد وبيشوش جامد علي المصلين .... او مستقوي علي الولاد اللي اصغر منه وممكن يعٓوّر حد فيهم .
أوعي تهينه وتكسره عشان هو حطك في موقف محرج.... المطلوب منك انك تبقي حازم معاه جدا ( بدون غضب) عشان تحد من تصرفه .... وخده علي جنب وأتكلم معاه وإستخدم معاه الترغيب والترهيب ... ولو مفيش إستجابة انصرف فورا من المكان ... وفكر ازاي تعدل من سلوكه ( وده موضوع نتكلم فيه بعدين).
الخلاصة ... تربية ولادنا أهم من نظرة الناس لينا.