في الأفلام والمسلسلات.... المخرج والممثلين بيحاولوا ينقلوا لينا الانفعالات والمشاعر المؤثرة الموجودة في مشاهد الفرح او الحب او الألم او الفراق او الاحساس بالظلم او الاحساس بالفقد .... إلخ
وده عن طريق أداء الممثلين وحركة أجسامهم ونبرة صوتهم...وعن طريق الموسيقي التصويرية وحركة الكاميرات والاغاني والسيناريو المعبر عن الحالة الشعورية دي.
وإحنا بنتفاعل مع المشاهد دي .... لدرجة إننا ممكن نبكي لما بنشوفها
شريك حياتك حياته فيها مشاهد حقيفية لا تقل تأثيرا عن المشاهد الموجودة في الأفلام.... بس الفرق إنها من غير موسيقى تصويرية ولا بترصدها عشرات الكاميرات ولا بيترجمها سينارست محترف.... لكن بيفترض إنك حاسس بيه ومتفاعل معاه
شريك حياتك منتظر منك الإحتواء وقت الحزن ... ومحتاج منك الدعم وقت الاحباط والفشل...بيستني منك المباركة والمشاركة وقت الفرح والإنجاز.
ممكن يكون شريك حياتك مش بطل في فيلم سينمائي بيشوفه الآف المشاهدين .... لكن في الحقيقة هو بيعتبر نفسه أنه أحد أهم الأبطال في حياة بتكتبوها و بتصنعوها سوا.