من التفاصيل الجميلة بين الزوجين واللي بينهم حسن عِشرة .... انك تلاقي حد يهتم بيك من غير ما تطلب .
كل واحد فينا بيعدي عليه وقت بيكون فيه مش مظبوط او تعبان او مضغوط.... وبيبقي عامل زي الطفل الصغير اللي ما بيتكلمش واللي عاوز حد يهتم بتفاصيل راحته من غير ما يطلب
يعني مثلا الزوجة تشوف ان زوجها جاي مرهق جدا ... فاتحضرله الحمام وتشده من إيده وتقوله تعالي خد دش ...وبعد ما يخرج يلاقيها مجهزاله مشروب بيحبه...وتبعد عنه دوشة الاولاد...كل ده من غير ما يطلب.
أو ان الزوج يبقي شايف ان زوجته بقالها فتره مسحولة في شغل البيت وان موودها مش مظبوط .... فيقولها ماتعمليش اكل النهاردة ويطلب اكل من بره ...او يقترح عليها انها تزور حد من صديقاتها المقربين ويخلي الاولاد تحت رعايته... أو يفسحها ....او حتي ياخدها يعزمها علي عصير قصب عند الراجل اللي في آخر الشارع
مع طول العشرة كل واحد بيعرف الحاجات اللي بتبسط شريك حياته....بيبقي لطيف انك تعمل الحاجة دي من غير ما يطلبها .
الكلام ده بيترجم عند شريك حياتك كأنك بتقوله ( انا حاسس بيك...انا مقدر تعبك....انا عاوز راحتك)
المشاعر دي هي اللي بتخلينا نقدر نكمل حياتنا في ظل المطحنة اللي كلنا عايشينها