(( إنت خذلتني))
دي كلمة من الكلام اللي قالته زوجة لزوجها أثناء خناقة حصلت ... لأنها طلبت من جوزها يعمل لها مشوار .... وهو ماكنش مهتم بالشكل الكافي
يبقى الموقف صغير... ولما يتكلموا فيه مع بعض ... يقولوا كلام كبير جدا بالنسبة للموقف ... فالمشكلة تبقى كبيرة ... كبيرة بالشكل اللي بيسيب جروح وممكن يوصلهم للطلاق .
الموضوع ده آفة بيوت كتير للاسف ... إن الزوجين يتزحلقوا في نقاشات جدلية فلسفية ويستخدموا فيها كلام كبير مجعلص ومصطلحات ضخمة ... مع إن الموضوع أساسا تافه وسطحي ومالوش أي أبعاد مهمة ومالوش أي علاقة بتراكمات تانية
فالخناقة تنتهي بكلام من نوعية (إنت خذلتني) او (صحابي كان عندهم حق لما حذروني من الجواز) او ( انا مابقتش عاجباك ) او ( لولا الاولاد كنت طلقتك) او ( أنا مش حاسة بالأمان )... او يتكلموا كلام فلسفي حوالين مفهوم الطاعة ويتهموا بعض بإتهامات من نوعية (إنت متسلط ذكوري ) و (إنتي ناشز وعنيده ) .
كل الكلام ده يتقال في موقف كان الأصل فيه خلاف على كوباية الشاي اللي بقالها يومين ع السفرة 😏
مهم إننا نتعلم نحط كل حاجة في حجمها بدون تهويل او تهوين ... وبلاش ننجر بسهولة للترجمة المتضخمة للمواقف ... وبلاش نستسهل إسقاط كلمات كبيرة على مواقف لا تحتمل كده
إستهدوا بالله كده ... وزقوا معانا اليوم ...وماتخلوش الحياة صعبة اكتر ما هي صعبة أساسا